Partido POR lo trece cambio na fabor di e pensionado

Segun Otmar Oduber di E Forsa Nobo

 

Plataforma E forsa Nobo POR a dicidi di prepara e oferta na comunidad y e programa di partido, mediante e “bottom-up approach”. Practicamente e ultimo 3 lunanan a bishita reuni y consulta cu gran cantidad di instancianan den comunidad.

Pa menciona algun di e instancianan aki: ATIA, KVK, AZV, SVB, diferente fundacionnan den comunidad, sindicatonan, NGO’s, diferente gruponan cu a fomenta discusionnan bou di nan, “focus groups”, a tene encuestanan den enseñansa cerca maestronan y alumnonan, segun Otmar Oduber.

 

Tur esakinan a pone cu plataforma Pueblo Orguyoso y Respeta (POR) na e momentonan aki a fiha e puntonan di atencion cu ta wordo presenta proximamente den un documento cu ta keda un “work in progress”, te ora cu presente como e plan oficial na comunidad di Aruba na final di juni. E documento lo mester trece padilanti e necesidadnan cu a sinti ta biba como prioridad den comunidad.

“Contrario na hopi aña cu den seno di partido den gruponan selecto di profesionalnan hopi biaha ta haci e programanan aki, nos plataforma e biaha aki a scoge e caminda hopi mas largo, pero cu ta duna un bista real di loke ta e necesidad y prioridad di nos comunidad.

Mediante e “bottom-up approach” aki a fiha e puntonan di prioridad y lo expande riba esakinan pa loke ta trata un programa. Nos ta hasta elogia otro partidonan cu a tuma e ehempel aki y a sigui cu e direccion di consulta comunidad pa sinti loke ta biba den comunidad”, lider di POR Otmar Oduber a trece padilanti.

 

Desde aña pasa caba colega Andin Bikker a cuminsa riba e aspecto di nos pension, caminda a haci esaki un tema cu awe ta un discusion bou di mayoria di partidonan politico aki na Aruba.

A bisa cu no ta djis e fondo di pension ta importante, pero e calidad di bida di nos pensionadonan ta ainda mas importante. Mester conserva e fondo di pension aki, pero tambe percura pa e calidad di bida di e pensionado ta uno di un nivel halto manera cu ta propaganda den comunidad. “Mi ta contento cu puntonan di agenda manera cu nos a trece dilanti pa loke ta e flexibilisacion di edad di pension sin cu esaki mester costa/perhudica e fondo di pension awe ta discusion”, Oduber ta splica.

 

Partido actualmente den gobierno a bisa cu no por haci nada mas y cu edad di pension mester keda na 65 y kisas hasta subi. Nos como organisacion a bin cu un alternativa, a mustra cu por crea un ‘flex pensioen’ caminda cu ta duna e pensionado pa scoge segun curpa ta duna, cu e por baha na un edad mas hoben cu 65 aña.

Naturalmente manteniendo e fondo di pension cu mester conserva y mester garantisa pension di nos grandinan pa e añanan venidero. A mustra riba e topico cu ningun partido kier mishi cune cual ta e gastonan social cu un pensionado tin cu carga 100% su so.

 

“Ora cu bo ta pensionado bo ta paga AZV y otro aporte social 100% (werkgever y werknemer) cu hopi biaha ta un suma substancial. Nos a bisa hopi biaha cu mester revisa esaki y percura cu un persona cu ya caba ta cu pension no por paga esaki completo.

Tambe e belasting cu nos pensionadonan ta paga, cu na ora cu nan pone algo acerca of cu nan tin 2 pension, dibiaha ta hayanan ta paga belasting atrobe riba un pension cu ya nan a paga belasting riba dje den pasado, cual ta inhusto”, Oduber ta mustra.

 

Den e gobernacion cu ta bin mester percura cu ta goberna a base di prioridad y no a base di popularidad y den e caso aki nos grandinan cu ta forma un grupo sumamente substancial y significativo den comunidad mester haya oportunidad pa biba e ultimo añanan di bida na un forma mas digno conforme e contribucion cu nan a haci den comunidad, Otmar Oduber a finalisa.

Top