Partido POR ta presenta dos candidato cu tur potencial pa yuda trece e cambio desea pa comunidad

Ayera Otmar Oduber a anuncia e prome 2 candidatonan cu a uni nan mes cu partido POR. Nan ta candidatonan naci y lanta den distrito di San Nicolas, pero cu un curazon grandi pa loke ta trata desaroyo general di nos pais.
El a cuminsa na presenta, Curtis Frazer, yiu di John Frazer y sra. Teresa, kende kier sirbi su pais y a dicidi di uni su mes na Plataforma Forza Nobo.

Curtis Frazer a gradici su famia, p’e sosten y e paso tuma. El a lanta den Bernardstraat y su famia sienti’e semper pa tin amor pa comunidad. El a haci hopi trabao den Ministerio di Cultura y di Turismo. Aki el a siña masha hopi y t’e proyecto ey a pone afilia na politica y a dicidi pa subi lista di POR.
E no kier sigui impora pa Gobierno termina e proyecto cu e.o. el a cuminsa cune na San Nicolas y pesey a dicidi uni na POR, pa wak con e lo por drenta Gobierno pa finalisa un proyecto cu Otmar Oduber a dun’e confianza pa traha riba dje, pa pais Aruba.

E otro candidato presenta, tambe di San Nicolas ta Robin Ann Didder, un mama soltera, masha dinamico. E tambe ta bin di un famia masha conoci den deporte, e.o. softball y baseball.
Robin Ann Didder ta maestro, un persona masha dedica na enseñanza y educacion y t’e persona clave pa partido POR. E tabata ex – Presidente di SIMAR, y awedia ta Director adhunto di Middag-en Avond MAVO School.

Robin Ann Didder a bisa como maestro tin 3 Ministerio cu no a haya nan debido atencion. E kier sa ta cuanto strea nos enseñanza ta, siendo cu nos ta papia di un pais di 5 strea. Pesey el a dicidi di sinta den e “driver-seat” pa hiba enseñanza dilanti.
Lo ta bon p’e stakeholdernan tin enseñanza na pecho. Desaroyo di un mucha ta cuminsa na cas y asina lo sigui guia e yiu aki.
Pa loke ta Ministerio Social y Husticia, mester traha den combinacion di Ministerio di Enseñanza den formacion di e comunidad di mayan.
Dicho Ministerionan mester tin e toolnan pa logra e cambionan desea, y esey ta meta di Robin Ann Didder, formando parti di POR.

No a construi e skol di Noord, pero Gobierno a coi e placa aki pa cumpra tram. E kier t’e persona cu kier pone granito pa bienestar di pueblo. Y partido POR kier pa enseñanza ta halto riba lista di prioridad y den POR tin varios experto pa logra esaki, segun Robin Ann Didder.

Top