Partido ReD tin directiva nobo – Rudy Lampe ta retira for di bestuur manera anuncia

Semper den luna di october partido ReD ta tene su reunion anual di miembronan, manera e statutonan di e partido ta stipula. E Algemene Leden Vergadering t’e autoridad mas halto den partido ReD.

Dia 1 di october 2017 a keda eligi unanimamente Nelson Quandt como e Presidente nobo, Benjamin Romano como Secretario, y Nuris Lampe como Tesorero.

T’e Presidente hunto cu e Secretario of e Tesorero ta representa e partido, manera nos statutonan ta prescribi.

Banda di e directiva diario a eligi otro miembronan di e directiva, y tur otro organo di partido a keda completamente renoba.

 

Ta gradici e Presidente saliente, Robby Croes, y e Tesorero saliente, Fejite Zijlstra pa tur e trabao haci. Rudy Lampe, Secretario saliente, a cumpli cu su palabra di duna e generacion nobo e chens pa dirigi e partido.

E prome paso tabata di a pasa e liderazgo den man di Ricardo Croes, y awor ta realiza e di dos paso, cu ta di entrega e dirigencia di e partido n’esnan cu tabata candidato riba e ultimo lista.

Ta desea tur clase di exito na Ricardo Croes, kende lo guia e fraccion di ReD den Parlamento, y e directiva nobo di partido ReD.

 

Partido ReD ta orguyoso cu den e tarea cu Gobernador a duna n’e Informador a mencional tur e temanan cu tabata cardinal den programanan di ReD for di 2005, manera, un finanza publico sano y balanza, bon gobernacion, transparencia, reforza nos organonan di control, un Gobierno di coalicion, un investigacion independiente dor di organisacionnan internacional manera Transparency Internacional.

 

A yega e momento cu ReD for di awe dialuna 2 di october lo participa n’e ronda di Informacion, bao guia di sr. Arie Swaen, manera Gobernador di Aruba a stipula. ReD lo ta representa dor di Ricardo Croes y Robby Croes den e siguiente fase di consulta pa yega na un Gobierno nobo di Aruba.

Como Secretario saliente Rudy Lampe kier a gradici tur e miembronan, tur nan votadornan y tur ciudadano cu a pone nan mes disponibel pa traha p’e idealnan di ReD, cu awor a yega n’e nivel mas halto di nos Pais.

 

Rudy Lampe

Top