Partidonan di carta a bay den accion pa malcontento cu scooter di trabou nobo

Despues di a celebra Dia Mundial di post e dia prome, diamars mainta e partidonan di carta di Postkantoor a dicidi di vocifera nan mal contento pa cu e scooternan nobo cu nan a haya pa traha.

Nan a dicidi di tuma contacto cu nan sindicato y asina nan a drenta den un accion y sindicato SEPPA a apoya nan den esaki.

 

Sr. Gilbert Croes, cu ta partido di carta y tambe shopsteward, a splica cu nan mal contento ta debi cu e brommernan nobo di trabou cu Postkantoor a dicidi di cumpra, no ta condiciona debidamente pa nan trabou.

Directiva a cumpra e scooternan nobo sin a informa of consulta cu e partidonan di carta prome.

 

E scooternan cu nan tabatin antes tabata mas chikito y cu un baki memey den e scooter caminda nan tabata hinca e carta y paketenan cu nan tin cu parti rond. Pero awor e scooternan nobo tin e baki parti patras cual ta dificulta nan trabou hopi mas, teniendo na cuenta e peliger cu tin cu cacho y trafico rond di nos isla.

 

E partidonan di carta ta exigi directiva di Postkantoor pa kita e baki patras di e scooternan nobo y bay bek n’e sistema cu nan ta custuma di traha cun’e semper y cu no a duna problema den pasado.

E partidonan di carta no lo bay hasi nan trabou tanten cu no kita e baki patras.

Nan no ta pidi pa cambia e scooter pasobra esaki no ta un opcion mas, pero nan kier sigi hasi nan trabou di e manera cu nan ta bin ta hasi’e pa tur e tempo aki.

Top