Partidonan di Coalicion a pidi reunion publico urgente tocante Status Minister demisionario Paul Croes y su retiro

Parlamentarionan di MEP, POR y RED a pidi reunion urgente pa trata dos tema importante.

  1. T’e status y retiro di status y retiro di Minister drs. Paul Croes. For di dia 28 di maart 2017 cu Minister Paul Croes a wordo declara sospechoso den un caso di corupcion serio, y a tene un ‘inval’ na su cas, Aruba su Gobierno ta constantemente den un lus negativo. For di oposicion MEP a purba coregi e situacion aki, pero sin resultado.

 

Dia 12 di mei 2017 Gobierno di AVP a dicidi di kita e carteranan di e Minister temporalmente, y for di e fecha aki e Minister ta un Minister sin cartera.

E situacion a bira mas serio na momento cu dia 21 di augustus 2017 e Minister a ser deteni y ta deteni ainda pendiente su caso wordo trata.

Esey mester tabata motibo mas grandi pa Gobierno a retira e Minister. Lamentablemente cu esaki Gabinete Mike Eman a duna e mal ehempel di ta acomoda corupcion, enbes di combati corupcion.

 

Segun MEP-POR-RED, pa prome biaha den historia di Aruba y di Reino un Minister a wordo encarcela. E bon nomber y integridad di nos pais a wordo daña.

Lamentablemente e contelacion bieu di Parlamento a aproba y a defende e decisionnan aki.

Dia 21 di september 2017 Prome Minister Mike Eman a entrega retiro di su Gabinete, incluyendo di Minister Paul Croes, en bista di eleccion dia 22 di september. Gobernador a haci un apelacion n’e Gabinete pa keda na cargo como un Gabinete demisionario solamente pa casonan coriente.

E decision pa Minister Paul Croes entrante 21 di september bira demisionario pa atende casonan coriente so, no tin sentido p’e motibo cu e no por atende ningun caso mas for di 12 di mei cu a kita tur cartera for di dje, y sigur desde 21 di augustus cu e ta deteni.

Despues di eleccion di 22 september ultimo e constelacion den Parlamento a cambia, y e mayoria di e miembronan nobo den Parlamento tin un otro punto di bista den e caso aki.

“Nos a bay eleccion pa pidi pa un cambio y pueblo a vota pa un cambio. Cu e reunion aki nos kier demostra e cambio ey.

Nos ta hendenan cu ta bisa loke nos ta haci y nos ta haci loke nos ta bisa. Y nos a bisa cu nos si ta bay combati corupcion y esey mes nos ta bay haci.

 

Mi ta contento cu e reunion a wordo yama liher, pasobra ta algo cu den comunidad tur hende ta puntra.

Mi ta enfatisa cu no ta trata di e persona di Paul Croes, pasobra e sigur ta un persona simpatico.

Ta bay p’e funcion di Minister y e hecho cu a causa daño na imagin y integridad di Aruba.

Cu e reunion aki e Parlamento nobo kier cuminsa repara e daño cometi p’e Gobierno anterior” lider di MEP Evelyna Wever-Croes a duna di conoce.

 

Di dos punto di agenda, ta e caso di construccion y reconstruccion di Dr. Horacio E. Oduber Hospital. E miembronan di MEP-POR-RED kier sa con leu esaki ta bayendo y sigur kier sa di e carta cu Minister di Salubridad Publico, dr. Alex Schwengle a manda dia 12 di october ultimo. Ta manera drs. Marisol Lopez Tromp y mr. Andin Bikker a cuestiona ultimamente, cu tin un desaroyo cu no a bay bon, pa loke ta trata e huur di edificio cu a ser aumenta, sin aprobacion di Parlamento.

 

E reunion aki lo tuma lugar awe mainta pa 10 or y mester bisa, ta di dos reunion publico di Parlamento, den su constelacion nobo.

 

 

 

 

Leave a Reply

Top