PAWA no tin debe na Aruba, pero Tin hopi pasashi bendi, cu un ora pa otro, lo no ta valido mas

Si mester declara PAWA bancarota

 

 

Despues cu nos a publica ayera cu e compania AeroDom XXI a haci un peticion na autoridadnan Dominicano pa laga haci un investigacion di solvencia economico di PAWA Airlines, ta masha reaccion a drenta na nos mesa di redaccion.

Un pregunta cu nos a haya ta, si PAWA tin debe cuantioso na Aruba tambe? Un ehecutivo di AAA N.V. a duna di conoce cu asina leu cu e sa, PAWA Airlines no tin debe pasobra AAA N.V. ta opera cu nan riba un base di cash deal.

 

Pero AAA N.V. a tuma nota di e publicacionnan cu no solamente a sali na Aruba, pero aparentemente tur rond di Caribe. Y na Aruba, sigur e ex-empleadonan di Air Aruba, no kier tende ni kier mira Simeon Garcia, kende ta doño di PAWA, kende nan ta considera un “boef”, kende a perhudica sigur 300 tata y mama di famia, ora el a laga Air Aruba bati bancarota, pero e si a keda bon.

 

Otro informacion cu nos a haya ayera ta, cu aparentemente masha hende a cumpra pasashi pa bula cu PAWA, no pasobra nan kier bula bay Santo Domingo, pasobra practicamente PAWA a tuma tur ruta cu InselAir tabata bulando y bulando di PAWA, tin pasahero ta kere cu nan por yega p.e. mas liher Miami, Puerto Rico, Haiti, Cuba, y tur otro isla Caribense, pa cual no tin conexion aereo awor.

Cu excepcion si un pasahero kier bula cu American, y via di Miami por bay un di e islanan di Caribe, loke sigur ta mas caro.

 

Pero si PAWA mester ser declara bancarota, tur esnan cu a cumpra pasashi lo por perde nan placa.

 

DEBE CUANTIOSO

Di acuerdo cu AeroDom, “PAWA debe te cu awe e suma di US $ 1,062,809.61 servicionan cu Las Americas International Airport, Jose Francisco Peña Gómez (AILA-JFPG), a duna.

Apesar di tur esfuerzo haci y promesanan haci, PAWA no ta cumpli cu su obligacionnan, loke ta pone cu AeroDom ta evaluando pa cuminsa un caso legal contra di PAWA, pa por haya nan placa.

 

AeroDom no mester ser mira como un compania cu ta subsidia PAWA, cu cada dia cu pasa, e debe ta sigui aumenta.

Pasobra no ta solamente AeroDom, PAWA debe pero tambe varios compania cu ta duna otro tipo di servicio n’e compania di aviacion.

E situacion ta serio, y no por permiti pa pone bida di e pasaheronan den peliger.

 

 

Top