Persona cu transtorno mental a kibra mashin di ATM

Diadomingo, pa mas of menos 6’or y 5 di mainta, durante patruya banda panort di e edificio di Bon Bini Bazaar, polis a mira securitynan di Safe Com cu flashlight den man dilanti di e edificio di Win Me tabata coriendo direccion p’ariba y dilanti di polis tras di un persona desconoci. Mirando e hecho aki, polis a bay na altura di Aruba Bank y a mira un otro security di Safe Com. A acerk’e y a puntr’e kico tabata pasando. El a conta polis cu su colega a bay tras di un adicto ambulante sospechoso, pasobra algun minuut prome, el a distrui un ATM di Aruba Bank cu un balki di palo. Polis a tene un control den vecindario y na altura di La Granja nan a bin topa cu dos security kendenan tabata tin e adicto ambulante wanta. E adicto ambulante a bin resulta di ta e conocido di polis, e perturbado mental Christopher Geerman, kende a wordo aresta. Patruya di Noord a bin na e sitio y a hiba e sospechoso na warda di Playa. Eynan el a keda presenta dilanti di fiscal auxiliar y despues hiba na Santa Cruz, unda el a keda encarcela. Central a wordo poni na altura.

Leave a Reply

Top