Personal di Hospital den training prome cu muda Ta train varios scenario den cuadro di safety prome muda pashentnan

Durante diferente weekend Hospital a tene training di mudamento cu e nursenan, pa prepara nan bon pa dia cu muda p’e edificio nobo. Cada piso ta preparando nan mes bon p’asina dia cu e fecha pa cuminsa cu mudamento yega, tur cos por cana bon.

Un di e cambionan cu lo tin pa tur ta cu e edificio nobo ta mas grandi cu e edificio actual y e distancia di cada “station” ta mas leu di otro. Esey ta haci cu empleadonan di Hospital ta train tur cos diferente biaha pa ta sigur cu tur cos ta funciona bon. A train hopi cu e pagernan ya cu esaki ta algo nobo pa nan tur.

 

Meta di e training ta pa test cu e edificio nobo ta completamente sigur pa por cuminsa muda e pashentnan y cuida nan eyden, asina Clustermanager, sr. Chris Hubers a duna di conoce.

Un otro meta ta cu empleadonan por cuminsa custumbra cu e edificio nobo y e metodo nobo. Tabatin 3 departamento activamente ocupa cu e training diasabra ultimo, cual tabata Departamento di Mucha, Departamento di Verlos y B3 (piso 3 den e edificio nobo) unda cu e pashentnan di neurologia lo bay wordo interna. Departamento di Emergencia tambe a tuma tempo pa participa, unda cu nan a train e parti di ricibi pashentnan di emergencia.

“E momento di mudamento ta cerca y nan ta contento con tur cos ta canando te cu awo”, asina sr. Hubers a duna di conoce.

 

Sra. Ruthmila Odor-Croes, zorgmanager di Niet Snijdend 3 ta splica cu pa por a prepara mas miho, mester a haci training di diferente scenario pa loke ta partinan esencial manera oxigeno, e salidanan, e lift, drenta/sali cu e cama nobo, p’asina e personal por orienta nan mes y conoce e departamento. Como manager di piso, Ruthmila Odor-Croes tin un checklist y tur siman e ta papia cu e comision di mudamento, unda cu e ta informa tur e puntonan cu e team a mira.

Nan departamento ta traha cu 3 diferente team di cual tin un “eceiving team” cu lo percura p’e edificio nobo. Tambe tin un ‘sending team’ cu ta den e edificio bieu y tambe tin e ‘transfer team’, kendenan ta percura pe pashentnan yega bon di punto A pa punto B.

“E ta hopi great pa experencia”, el a duna di conoce.

 

E departamento di maternidad tambe a forma parti di e training di mudamento cu a tuma luga diasabra ultimo. Zorgmanager di maternidad, sra. Renita Blindeling, a duna di conoce cu e training a bay bon y nan a ripara cu e piso aki ta uno hopi mas grandi.

Awo tin hopi mas distancia pa core y yega na e pashentnan. Esaki ta pone cu e empleadonan mester ta hopi mas alerta pa ora yega na pashentnan, sigur tambe ora tin casonan di emergencia dor cu e distancia pa yega na e sala di operacion ta mas largo. P’esey lo bay traha cierto acuerdonan interno pa cu esaki.

 

Loke tambe ta nobo pa nan ta e “nurse call system” cu ta e sistema di pager cu nan mester custumbra cu ne. E nursenan aworaki ta custumbra traha via bel, pero den e edificio nobo esaki no ta e caso.

Ademas di esaki, riba nan piso tin e “birthing pool” cual ta un otro manera cu e mama por duna luz, esta bou di awa. Esaki ta algo nobo y tur hende mester custumbra cu e sistema aki.

Den futuro cercano e pashentnan por haci uzo di e posibilidad aki tambe pa duna luz.

 

Sra. Deninah Martina, nurse di mucha, tambe a participa den e training di mudamento di Hospital y ta conta cu nan a bini hunto p’asina mira cu ora yega e momento pa drenta den e edificio nobo, nan por haci esaki miho posibel.

Durante e training a percura pa train cu e sistema nobo di “nurse call” via pager unda cu a mira con lihe esaki ta traha; den cuanto tempo e pashent lo haya e ayudo necesario.

“Tur esakinan ta hopi importante p’e servicio cu bo ta duna pa cu e pashent”, el a duna di conoce.

 

Pa Hospital e momento di mudamento ta algo unico. Mester prepara un pashent y tur asunto rond di dje p’asina por muda bay otro piso. Esaki ta algo cu mayoria di e personal nunca a experencia. Tur esaki ta algo nobo y mester corda cu durante e proceso cambionan ta bay sosode.

E cambionan ta pa mas miho, unda cu kier brinda Aruba mas miho servicio, mas miho calidad di trabou unda cu e experiencia di e pashent ta na prome luga.

Leave a Reply

Top