Personal no ta haña informacion…. MD-nan di InselAir ta totalmente afgeschreven

WILLEMSTAD – For di entrevistanan cu e corant aki a haci cu conocedornan di materia di aviacion por saca e conclucion cu ta un milager so por scapa InselAir di un colapso total, pasobra e gran mayoría di e avionnan ta den tal estado cu ta practicamente imposibel pone nan den condicion pa bula sigur.

Banda di esaki e hecho cu e personal no ta hañando informacion riba kico t’e status di e compania tambe ta creando hopi intranquilidad, mientras cu particularmente e mayoria di pilotonan di MD82 y MD83 ta preparando nan mes pa busca trabou den exterior, pasobra nan ta consciente den ki condicion e avionnan ta.

 

Manera un trahador a splica: “Pa cada solucion cu haña pa un problema ta sali 5 problema mas”.

Pa colmo sigur tres di e avionnan MD nan tempu di bay C-Check a pasa y si normalmente un C-Check ta kosta 750.000 te 1 mion dòlar, awor esey lo costa dòbel.

Pero esey no t’e unico problema: E problema mas grandi ta cu si inverti e placa ey den e avionnan, cuanto tempu ta resta pa produci e placa bèk, pasobra tin indicacion cu aki dos aña Merca no ta pèrmiti e tipo di avion aki haci buelo comercial pa y for di Merca.

 

Loke ta remarcabel ta cu ni e pilotonan sa kico ta bay pasa cu nan cu si MD ta sigi of stop di bula, pasobra aworaki ta dos Fokker 50 so ta bulando y de bes encuando un Fokker 70 ta bula.

Un grupo di piloto ta cu vakansi obligatorio y e otronan ta riba stand-by, pero nan mes no sa pa kico, pasobra por lo pronto e avionnan MD no por bula.

 

Loke gran parti di e personal kier sa tambe cu ta bèrdad cu e avionnan ta di un compania di e Director Kluivert.

E aventura di bay papia cu Avianca tampoco a produci masha resultado dia Rhuggenaath a bay papia cu nan riba un eventual participacion di Avianca, pasobra Avianca mes ta na benta.

Si nan join mes, ta nan kier ta den ‘drivers seat’ cu nan mes gerencia y personal pa manehá e compania.

 

Otro version cu ta circulando insistentemente ta cu e supuesto 100 mion dòlar cu ta pegá na Venezuela no ta existi mas, pasobra a saca e placa ey via canalnan iregular mediante un abogado Italo-Venezolano kende tin masha bon relacion cu mandatarionan Venezolano.

Reportadamente InselAir tabata retrasá buelo pa Miami specialmente pa warda e abogado yega for di Venezuela.

Inselair ta bendiendo pasashi pa Miami y otro destinonan den region, pero ta bulando e pasaheronan cu otro companianan Mericano of Dominicano, pero e cantidad di pasaheronan ta masha poco.

 

Loke tambe ta un misterio p’e personal ta cu e compania nunca a aclará con bin a declará e Hefe di Servicio Tecnico Ivo Oduber como ‘persona non grata’ kende no mag subi instalacionnan di InselAir na Aeropuerto.

E rumor ta core cu e Hefe di Departamento Tecniko tabatin su mes compania cu yama Quantum na Merca den sociedad cu otro hende local cu tabata bende piesa ‘aftermarket’ cu InselAir.

Reportadamente e cabayero aki a traha un capital y a inverti e placa den inmobilario na Corsou y Aruba.

Bou di su responsabilidad a cumpra hasta machin p’e tayer di InselAir, pero cu nunca e machin no a funcioná y awor un compania di Puerto Rico cu tin cu haña sèn di InselAir ta dispuesto pa tuma e machin nobo, pasobra aya sí nan por uzé.

 

 

 

 

Top