Peticion di Huez na Parlamento: Por fabor no aprobá glas mas scur pa auto!

O’STAD-W’STAD – Diahuebs tabatin un caso di violacion di regla di trafico den Corte na Corsou,  cu a cue un buèlta interesante ora cu primeramente Huez no a dicta boet contra un automobilista cu no tabatin su documentonan cune, pero alabes a haci uso di e oportunidad pa haci un apelacion urgente riba Parlamento pa no aprobá glasnan di auto mas scur cu legalmente ta permiti aworaki.

 

E caso aki a hala nos atencion, pasobra meramente ayera nos a haci mencion cu husticia no por midi cu dos midi. No por t’asina cu awor Ministerio Publico ta sali cu tur su furia pa persigui esnan cu ta usa celular ora di stuur, dunando boet di 500 florin, pa cual varios chofer a haya boet.

Pero tambe nos tin ley pa cu glas scur, tinted glass, pero aki Ministerio Publico (lesa: Polis) no ta actua contra e chofernan aki.

Pasobra fuera di tin politico cu tin nan glas di auto scur, tin tambe varios Polis, cu sigur tambe ta viola e ley aki, pero ni un musca ta bula.

 

Prueba cu husticia tin un dobel standard na Aruba y esey tambe lo t’e caso na Corsou, cu awor un Huez den Corte a dicidi di haci un apelacion na Parlamento, pa stop importacion di auto cu glas scur, esta no mas scur cu legalmente ta permiti aworaki.

Manera menciona, na Aruba tambe tin e ley aki, pero Husticia no ta haci net nada, cu excepcion Keurings Lokal, ora di keur auto, cu si constata cu e windshield y glas di chofer y pasahero dilanti ta scur, e ora ey ta ordena nan pa kit’e prome cu keur e auto.

 

Pero si e ta un auto nobo, y tinted despues di cumpr’e, dicho auto lo keur despues di 3 aña. Kier men pa 3 aña ta core cu glas scur.

Husticia tuma ehempel di Huez na Corsou, cu ta mesun Huez pa cu nos Corte Comun di Husticia pa Aruba, Corsou, St. Maarten y Islanan BES.

Leave a Reply

Top