PG di Aruba, mr.Alexander van Dam A desea Presidente nobo di Corte Comun, mr. Eunice Saleh tur sabiduria y felicidad Na mes momento a gradici e Presidente saliente pa su trabao

“Ta un honor pa mi por felicita señora Saleh cu su instalacion den nomber di Ministerio Publico den e parti Caribense di Reino Hulandes.

Señora Saleh, mi ta desea bo hopi sabiduria, pero tambe felicidad y placer den bo funcion nobo. Ministerio Publico ta spera riba un bon cooperacion y mi ta felicita Hof cu su Presidente nobo”, asina Procurador General di Aruba, mr. Alexander van Dam a bisa den su discurso diabierne ultimo na Corsou.

 

E tratamiento extraordinario aki ta tambe den cuadro di despedida di mr Evert-Jan van der Poel. Mr. Alexander van Dam kier para keto na su despedida. Mr Van der Poel a cuminza como Presidente na april 2013.

“Bo a bisa esten cu bo lo cumpli cu e funcion temporalmente. Tog bo a keda casi 4 aña. Durante e tempo ey bo a logra hopi cos, y den nomber di Ministerio Publico mi kier gradici bo p’esey. Tabata bon pa traha hunto riba nivel di maneho, claro no pa loke ta trata casonan individual, pero esey ta papia pa su mes.

Den nomber di Ministerio Publico di Caribe Hulandes, mi ta desea bo hopi exito”.

 

Diahuebs 22 di december di 2016, señora mr. Saleh a huramenta como Presidente di Corte Comun di Husticia di Aruba, Curaçao, Sint Maarten, Bonaire, Sint Eustatius y Saba. El a huramenta dilanti Gobernador di Corsou, señora George-Wout.

“Presidente Eunice Saleh, abo no ta zomaar iemand. Bo t’e di dos Presidente di Hof cu ta carga e fam Saleh.

Bo tata Jaime Saleh tabata e prome na 1979. Esey ta hopi especial y mi por imagina mi mes cu bo famia ta masha orguyoso cu bo ta wordo instala awe.

Bo ta den funcion pa un luna caba. Mi lo no puntra bo con bo a haya e luna aki, pasobra tempo ta cortico (y ademas no ta pas pa mi haci bo un pregunta asina dilanti tanto hende)”.

 

“E Presidente anterior, mr Van der Poel, a bisa tempo el a wordo huramenta na april 2013, cu e lo cumpli temporalmente cu e funcion di Presidente. El a boga tambe pa un sucesor Caribense.

Abo ta un yiu di tera, un berdadero sucesor Caribense, y mi ta pensa cu lo ta bon pa Poder Hudicial ta consisti tambe di huristanan y otro hende cu ta conoce nan pais mihor en todo caso, cu e magistratonan Hulandes Europeo’, segun PG di Aruba, Alexander van Dam.

 

 

Top