Piscadonan ta protesta ley cu ta prohibi especienan cu nan sa gara

Leynan di medio ambiente ta extremo y ta afecta piscado negativamente

 

 

Recientemente Gobierno a publica AB. 2017, no. 48, cu ta contene un lista di especie pa protega. Varios especie nobo, awor ta prohibi y esakinan ta afecta piscadornan.

Ta trata particularmente di e siguiente especienan nobo cu ta protehi awor: Kreeft (Panulirus argus), Caribbean Spiny Lobster; Gutu (Scaridea) Parrotfishes; Tribon Martiu (Sphyrna mokarran), Hammerhead shark; Tribon Martiu (sphyrna lewini), Scalloped Hammerhead shark; Manta (Manta birostris), Manta ray; Djukfes (Epinephelus itajara), Goliath grouper; Yacupeper (Epinephelus striatus), Nassau grouper; Buni (Thunnus thynnus), Atlantic Bluefin Tuna.

 

DECISION DI MINISTER DI MEDIO AMBIENTE

Gobierno a scoge pa apunta e lista bou di articulo 4 di Natuurbeschermingsverordening, AB. 1995 no. 2., den un LBHAM, cu no ta rekeri bay Parlamento pues Minister ta dicidi pone y igualmente por dicidi pa kita.

Den articulo 6, enciso 1 di AB. 1995, no.2, ta prohibi pa mata of haci herida un bestia cu ta pertenece na un bestia cu ta menciona den articulo 4. Pues ningun di e especienan aki por ser pisca of mata of herida mas aki na Aruba.

 

Piscado di afo si por bende nan: Dus conforme e lista, no por pisca e especienan ey mas y si bo pega uno na liña, tambe bo ta kibrando ley aki.

Ironicamente, varios di e especienan aki si lo por wordo importa sin mas. Esaki lo crea e ora un situacion cu boto Venezolano (of otro lugar) si por trece lobster of otro especienan aki pa gana placa aki, pero e piscador humilde local no por hiba uno ni cas pa mata su hamber. Esaki ta inhusto contra piscador local.

 

APLICACION STRAÑO DI PROTOCOLNAN INTERNACIONAL

Minister di Medio Ambiente y su Departamento di Medio Ambiente y Naturalesa, a usa como argumento, CITES y of SPAW protocol. P.e. kreeft, ta unicamente nombra den e protocol SPAW (tabel iii).

Pero SPAW (tabel iii) y mayoria di protocolnan ta urgi regulacion, pero no prohibicion, dus e ta desproporcional y inhusto contra piscador aki na Aruba. E protocol(nan) ta papia di traha cu grupo di interes (stakeholders), loke no a pasa aki.

E protocol(nan) ta papia di concientisacion, cual tampoco a tuma lugar aki.

E protocol(nan) ta papia di tene cuenta cu situacionnan manera cultura, tradicion y caracteristicanan local di e especie, esaki no t’e caso aki.

E protocol(nan) ta papia di haci estudionan regular, no tabatin estudio debido na Aruba. Aki no a tuma consehonan di LVV y SCPH den e ley.

 

Protocolnan no ta un obligacion pa prohibicion, pero ta urgi Gobierno(nan) local pa implementa regulacion pa yuda protehe. Protocolnan internacional tin diferente tabel pa acapara diferente nivel di proteccion, masha poco ta prohibi totalmente y ta laga cada pais y autoridad local defini con e ta implemente.

Ta na Aruba so, kier automaticamente prohibi tur especie cu tin riba cualkier protocol mundial cu Hulanda ratifica.

Poco pa no bisa ningun pais den henter Caribe a bay den e extremo di prohibi kreeft of otro especienan.

Gran mayoria y lugarnan manera e.o. Florida, Saba Bank of Bonaire, unda si a studia e especienan, a scoge pa trece regulacion of zonificacion unda ta permiti captura.

 

EFECTO DESPROPORCIONAL RIBA PISCADOR LOCAL

Na Aruba, ta bon conoci cu no tin pesca comercial cu ta mata especienan menciona na gran escala. Riba nivel regional of mundial, nos flota di boto piscado ta relativamente chikito compara cu region of mundialmente, e ta un fraccion masha chikito compara cu cantidad di piscador of nan flota na paisnan grandi.

E posibel impacto cu piscadornan local tin riba e especienan aki riba nan poblacion mundial of hasta regional, ta minimo (bou di 0.0001%).

Hasta riba nivel local, e cantidad cu ta ser gara aki, ta chikito y improbable cu ta afecta nan poblacion di especienan cu ta regional of hasta mundial.

 

PROHIBICION TA AFECTA PISCADOR 100%:

Pero, e prohibicion si, ta afecta enormemente e piscadornan grandemente y 100%. E ta un medida desproporcional contra piscadornan humilde local.

Riba nivel local, e desaroyo tanto riba tera como den awa cu mas movecion di vehiculo y turista den awa, como tambe cambio climatico, tin un efecto(nan) mucho mas grandi riba e poblacion di pisca of bida marina, cu e piscadornan local por causa.

 

Especienan manera tribon, djukfes, yacupeper, manta, ta ser encontra poco biaha como un by-catch mas bien y unabes gara, ta dificil libera esakinan bek cu bida. No ta husto pa e piscador hañ’e confronta cu husticia dor di esaki.

Kreeft, segun estudionan, no ta bou di presion dor di nan biologia, esta cu nan ta reproduci jong y ta produci hopi webo. Nos ta cita di un estudio internacional:

Caribbean spiny lobsters are not classified as endangered or threatened, although they are listed on the SPAW protocol (UNEP undated). Aspects of their biology, such as relatively low age at sexual maturity, medium maximum age, and high reproductive potential, may contribute to a relatively low inherent susceptibility to fishing pressure (Cascorbi 2004). The fishery is regulated, including measures such as closures during spawning season, trap-reduction programs, legal size and bag limits. Also illegal in some countries is harvesting of egg-bearing females, and fishing with firearms or explosives.”

 

LEYNAN AMBIENTAL EXTREMO

Piscadornan ta sufri hopi caba bou di leynan extremo di medio ambiente cu a ser pasa na Aruba den forma scondi, durante transicion gubernamental, manera p.e. e ley di spearfishing na 2001.

Prohibicion di especienan manera turtuga, calco y metodonan manera spearfishing den pasado a keda pasa cu ta afecta e pober piscador, sin cu te awe ainda a habri e peskerianan aki bek of sikiera haci estudio relevante di e posibilidad pa bolbe habri e peskeria of evalua e efectividad di e medida extremo como proteccion pa especienan envolvi.

Piscadornan ta sclama cu nan no por acepta mas prohibicion cu ta afecta nan porvenir mas. Piscadornan no kier keda persegui inhustamente dor di husticia pa un ley cu no a bay conforme e propio norma cu e tratadonan internacional ta exigi pa proteha “stakeholders”.

 

PETICION DI PISCADORNAN

Piscadornan ta mira suficiente motibo pa Gobierno coregi e ley of segura piscadornan local cu nan no por wordo persegui penalmente na momento di eherce piscamento den awanan teritorial.

Piscadornan ta haci un plegaria n’e Minister encarga pa unicamente haci lo corecto den e caso aki.

Piscadornan ta urgi Gobierno, particularmente, Minister encarga cu medio ambiente pa coregi inmediatamente e fayo cu e ley AB. 48 aki p’e no afecta piscadornan haciendo nan trabou, ofishi of tradicion.

Piscadornan ta urgi Gobierno, particularmente, Minister encarga cu medio ambiente pa coregi inmediatamente e fayo cu e ley AB. 48 dor di informa Openbare Ministerie y Departamentonan di Polis y Guardacosta pa ningun piscador keda persegui legalmente pa kibra e ley aki, tanten cu no coregi esaki.

 

 

Top