Placanan di campaña, di unda nan ta bin

Pa: Leslie Merkies

 

Den e campaña politico di e aña aki pueblo por mira claramente cua t’e partidonan cu ta spat cu placa manera ta fo’i un pal’i coco den nan cura di cas nan ta haye.

Di unda anto tur e placanan aki ta bin??

Por ta placanan cu ta bin fo’i actonan di pasado y pasado recien di maniplucion cu fondonan publico??

Of por ta placanan sushi, pero bon laba cu ta bin fo’i fuente-y instancianan den mundo bon conoci cerca nos comunidad Arubano?

 

Tambe tur hende ta puntra nan mes, ta di unda un mini-partido recien funda, manera e Plataforma di Odio y Rencor (POR) por ta sacando asina tanto placa pa spat y regala y tambe tur e materialnan di campaña cu pueblo ta mira nan ta expone.

Pero apesar di tur esaki, diabierna cu a pasa, pueblo di Aruba a duna un señal hopi cla, cu e pueblo aki ta hopi mas inteligente cu esnan cu solamente ta kere den e manipulacion- y mentiranan di campaña.

 

Semper bay nos mester keda corda riba e expresion di Nel Oduber di MEP: “Campaña ta un cos, y goberna ta un otro cos”!!!

E pueblo di Aruba cu su manifestacion di dia di entrega lista di candidatonan a duna un señal hopi cla, cu e pueblo humilde, sensato y honesto kier sigui den e rumbo di progreso y mas progreso.

E pueblo di Aruba a manifesta bon cla cu e kier laga tur hende sa, cu e ta bay bisa un NO grandi na un supuesto Gobierno nobo cu tin intencion di bolbe bay sigui practica “nepotismo”, es decir, cu manipulacion astuto destina tur e fondonan publico pa faborece solamente famia- y amigonan cercano. Pa pueblo y Pais lo no tin nada. Solamente medida.

Leave a Reply

Top