Plataforma digital: www.boaruba.com ta un herment util pa studiantenan local

Dia 1 di augustus ta bay habri oficialmente su portanan e prome di varios exposicion titula ‘Expo Futuro’ y adicional na dje a lansa dialuna mainta e website www.boaruba.com of tambe www.boaruba.aw cu na opinion di Prome Minister Mike Eman, lo ta un herment valioso pa studiantenan local.

“Nos sa por ehempel cu na EPI den e Zorgafdeling tin hopi interes pa haya sa di e Hospital nobo y asina riba e website por haya hopi informacion specifico di e proyectonan,” Premier Eman a splica.

 

Online por lesa no solamente e noticia cu ta sali den medio di comunicacion, pero tambe ta haya aceso n’e ‘Projectdossier’ cu ta consisti di 100 di pagina cu descripcion detaya di con e proyecto ta inicia, kico t’e vision su tras, di cuanto fase e ta consisti, etc.

Esaki ta informacion hopi util specialmente pa nos studiantenan y esnan cu kier profundisa nan mes den e tema of ta interesa den un estudio relaciona, pero tambe simplemente kier aporta n’e futuro di pais Aruba.

 

Atrabes di texto, video, mapanan, entrevista, etc. tin hopi informacion pa hobennan cu kier traha proyecto y werkstukken riba temanan manera Green Corridor, Watty Vos Boulevard, Renobacion di Oranjestad,  e vision di sostenibilidad 2020, etc.

“Tur esaki ta temanan cu hobennan na scol tin hopi interes pa por profundisa riba dje,” Premier Eman a bisa splicando cu hopi biaha ta ricibi peticion y bishita di studiantenan na Bestuurskantoor.

 

E proyecto, por ehempel, di sostenibilidad 2020 cu Aruba lo ta 100% basa riba energia renovabel ta un di e proyectonan cu  hopi bes nos ta haya peticion di studiantenan pa sa cuanto capacidad di energia renovabel Aruba tin awor, cuanto capacidad nos ta bay tin den 2, 3 of 4 aña y con ta bay alcansa 100%.

Tambe kier sa con e mezcla ta, esta cuanto di biento, cuanto di solo y cuanto di waste to energy. “Esaki ta pregunta cu nos ta haya di studiantenan y nan kier sa tambe cua di e energianan aki ta mas eficiente, cua ta menos costoso y cua ta pas mas den loke Aruba por ofrece di su naturalesa,” e mandatario a señala.

 

Top