Plataforma politico POR lo introduci pensioen flexibel. Pensionadonan no lo paga belasting mas riba pensioen

Plataforma Politico E Forsa Nobo, POR ta garantisa cu lo introduci e concepto di ley cu a presenta di iniciativa pa loke ta trata flexibilidad di pensioen.

Cu e mesun espirito aki lo kier bin cu cambionan tambe pa personanan cu ta ricibi bijstand of cualkier ayudo social.

Varios persona den comunidad no por warda pa nan baha cu pensioen na 65 aña.

Tin persona cu ta traha den sector hotelero cu t’e industria cu ta carga nos economia y hopi ta traha trabounan cu ta ensera cu nan ta riba nan pia constant.

 

Tin esnan den e sector di construccion cu tin trabou pisa y tambe otro sectornan cu ta rekeri hopi esfuerso fisico, cu na final di dia ora cu bisa nan cu no ta 60 mas, sino gradualmente cu 65 nan ta baha cu pensioen, hopi no por yega e edad ey, sr. Andin Bikker a splica.

Los di esey ta conoci cu tin diferente persona cu e.o. a sera acuerdonan considerando cu nan tey baha cu pensioen na 60 aña.

E tempo ey no a pensa cu lo subi edad di pensioen, pues tin personanan cu ta haya nan sin entrada pa algun aña.

P’esey introduciendo e flexibilidad di pensioen unda cu bo ta scoge si bo kier baha cu 60 aña bo por, hayando un “korting” chikito.

E ora e responsabilidad ta serca e persona y asina ta tene consideracion cu casonan individual.

 

PROTECCION FONDO

Pa proteha e fondo lo bin cu un “hardheidsclausule” pues un garantia p’e fondo. Pa si ta 5000 persona lo por haci uzo di e opcion pa bay mas tempran cu pensioen normal, den caso cu por ehempel 8000 aplica, ta bin cu un keuring medico pa selecciona e 5000 y asina ta proteha e fondo.

Esunan cu ta bin na remarca e ora pa por haci uzo di e oportunidad ta haci’e, y e resto ta bay p’e siguiente aña.

Ora wak cu den Reino tin paisnan cu e opcionnan aki, mester evalua esaki y no tin nodi inventa e wiel di nobo, segun sr. Bikker.

 

SISTEMA COBRA BELASTING

E hecho cu e belasting aworaki ta wordo cobra riba e pensioen di biehes, ta castiga un pensionado cu si e kier traha un poco bolo pa haya poco entrada extra, ta conta e dos entradanan aki hunto y nan tin cu paga belasting riba esaki.

POR ta bisa cu e pensioen aki ta sagrado, no lo mester paga riba e parti aki di pensioen, Otmar Oduber ta enfatisa.

 

Si un pareha of un pensionado kier haci actividad adicional esey ta posibel y no por castige dor di aumenta loke e ta haci extra cu su pensioen, compara cu e bisiña cu porta ta cobra pensioen so y no ta paga nada di belasting riba e pensioen.

Mescos cu a bisa tambe cu lo habri e discusion bek di participacion, actividad y obligacionnan social cu pensionadonan tin.

N’e momentonan aki nan ta paga e suma completo di AZV, cual ta un peso demasiado grandi riba nos pensionadonan.

 

Finalisando sr. Otmar Oduber a bisa cu esaki t’e mesun espirito cu kier bin cu ne pa loke ta esnan cu ta cobra bijstand/onderstand of ta ricibi cualkier ayudo social.

Cu cierto momento ora cu nan kier yuda nan mes pa tin un bida mas digno pa por tin un mihor biba, ta wordo castiga cu sea FCCA ta aumenta prijs di nan cas of ta reduci e fondo cu nan ta haya. Cual no t’e meta pa cual ta duna un ayudo social.

 

Duna 2% of 15 florin tur luna no ta yuda e persona cu tin un problema social, bo mester gara e problema na su rais, pues no duna personanan pisca pa come, sino siña nan con pa pisca pa nan por biba na un forma mas digno, el a conclui.

 

Top