Poco-poco Aruba ta birando mas berde

Na momento cu sende e prome luz LED den e bario di Seroe Preto na Paradera, esaki ta tumando lugar dilanti e percela 17-A. Un cas unda cu e propietario ta sostene e vision di Gabinete Mike Eman II pa bay den direccion di sostenibilidad. Esaki ta un pensamento cu ta wordo comparti dor di diferente ciudadano den e bario aki.

 

Durante e Accion di Bario den Seroe Preto, Prome Minister Eman a combersa cu basta ciudadano, e.o. riba loke cu Gobierno a haci caba y ta haciendo. E habitantenan ta apoya e maneho sostenibel cu Gobierno kier introduci den diferente sector di bida.

Un di e ciudadanonan aki ta Ad Rekker, ta un pintor conoci, kende tin mas o menos 7 aña bibando den bario di Seroe Preto. E ta contento cu e bario, cu ta basta trankil y unda e ta biba ta un tiki leu di e trafico.

 

Rekkers ta gusta naturalesa y pesey ta contento cu e vision di Gobierno y Prome Minister Mike Eman. E mes, segun el a conta, ta trata di haci hopi na proteccion di ‘berde’.

E tabata hopi contento cu bishita di Prome Minister Eman y a conta e mandatario cu “mi ta purba di duna mi contribucion. N’e parti patras di mi cas, riba e dak, mi a pone panelnan solar.

Dor di esey mi ta paga menos coriente.”

Rekkers ta un persona cu ta kere fiel den sostenibilidad. No solamente e tin panelnan solar riba dak di su cas, pero tambe e tin un auto cu ta core riba coriente.

“Tur accion chikito ta yuda,”el a bisa.

 

Pa loke t’e bishita di Prome Minister n’e bario, el a bisa cu esaki ta algo cu e ta haya hopi tremendo.

“Ta hopi bunita cu e ta bishita e ciudadanonan personalmente y mi ta haya su iniciativa pa haci Aruba mas berde posibel ta algo hopi bon. Mi ta apoya esaki y mi ta purba di participa den e pensamento berde.

Mi ta haya cu ultimo añanan el a logra hopi manera e panelnan solar na Aeropuerto, e molinanan di biento. Poco-poco Aruba ta birando mas berde y esey ta hopi bon.”

 

Apoya e pensamento di Gobierno riba sostenibilidad, entre otro den energia, e ta bisa ta nifica cu e ciudadano mester haci un inversion na inicio y a lo largo esaki ta paga su mes.

 

Top