Poema Tata Padu di Waldy Simson

E poema Tata Padu, cu a wordo scirbi dor di artista polifacitico Waldy Simson, a wordo scogi pa wordo usa riba dia di inauguracion di Plaza Padu den Oranjestad, Aruba.

Den e poema Simson a trata, entre otro, contribucionan unico cu Padu, como hende y como artista a duna riba tereno di arte y cultura di Aruba.

Padu Lampe, kende awor tin 96 aña, t’e unico di e tres compositornan di e himno di Aruba, Aruba dushi tera, cu ta na bida ainda.

Inauguracion di Plaza Padu lo tuma lugar diabierna 17 di maart benidero y e poema Tata Padu lo wordo proyecta anto riba diferente screen cu lo tin na Oranjestad.

 

Tata Padu

For di sero hopi mas halto cu Jamanota

mi por scucha, si, scucha bon cla

coro di hende grandi y chiquito cantando cu amor

Cu bosnan manera angel y bou guia di Shon Odor

hende homber y muher ta cantando desde fondo di nan curason

“O Aruba dushi tera nos baranca tan stima”

palabranan cu tambe a sali desde fondo di bo curason

Cu henter mi alma

si, ami tambe por a sinti con, cu un orguyo di pouwis

coro di henter bo pueblo tabata canta di nan gran cordialidad

di nan pais Aruba

tambe fuente di bo inspiracion

Tata di nos cultura

si, hopi grandi ta nos amor pa bo y, si, pa bo so

danki p’e cosnan asina valioso cu

abo so, si, abo so

por a duna nos!

Waldy Simson

Dedica na:

Juan Chabaya Lampe, miho conoci como Padu Lampe y Padu del Caribe , Naci riba dia 26 di april 1920 na Oranjestad, Aruba, Artista polifacetico, un di e compositornan di Aruba dushi tera, e himno di Aruba, El a wordo condecora diferente biaha dor di diferente pais

Top