Polis a detene 35 sospechoso di ladronicia Den e prome kwartaal di e aña aki

Den cuadro di promove transparencia y comparti mas tanto informacion cu comunidad, e departamento di recherchenan encarga cu ladronicia domestico a emiti cifranan di e prome kwartaal di aña 2017, pues specificamente e lunanan januari, februari y maart 2017.

Den esey a detene no menos cu 35 sospechoso.

 

Na luna di januari a detene 5 sospechoso relaciona cu ladronicia den casnan. A detene 1 sospechoso den caso di ladronicia na La Granja, otro sospechoso den un investigacion den casino y 3 sospechoso relaciona cu e proyecto “Paisano” pa ladronicia den casnan situa den area di Safir, Esmeralda y Palm Beach specificamente. Tur ta casnan cu ta huur cu turista pa pasa vakantie.

 

Relaciona cu e cifranan presenta, ta tuma nota cu a haci 2 “huiszoeking”, tanto na un cas na Opal y otro na Bushiri. Na tur a interoga 15 sospechoso relaciona cu e casonan andando y e recherchenan a traha 23 proces-verbaal di “bevindingen”. A scucha 4 testigo den e casonan aki. Den luna di januari, e recherchenan a presenta 6 “dossiers” na Ministerio Publico, cla pa manda Corte pa Hues atende den caso penal. Ta trata di casonan conoci como Crox, Hagemeyer, LG Smith, Ronde Klipweg, Savaneta y Sividivi.

 

Na luna di februari, a detene 13 sospechoso. Ta trata di 2 sospechoso den e investigacion di Esquire, 2 sospechoso di hortamento na Jan Flemming, 1 sospechoso pa hortamento den Beatrixstraat y 8 sospechoso di un grupo di ladron di alcohol, cu ta sospecha di a horta na Pepia Est, Casa Vieja y Kong Wong.

 

Na tur a efecta 12 “huiszoeking” na Rooi Congo, Caya St. Lucia, Bernhardstraat, Jam Flemming, Papilon, Moko Minimarket, Caya Jose Geerman, Mira Mar Rum Shop, Cura Cabay Supermarket, Sero Patrishi, Bubali y na Suin Sang Supermarket.

A interoga 23 sospechoso, a prepara 33 proces-verbaal “bevindingen” y a scucha 2 testigo.

Na luna di februari a entrega 1 dossier na Ministerio Publico, relaciona cu e caso di Sabana Liber.

 

Pa loke ta trata e cifranan di luna di Maart, a detene 17 sospechoso, di cual 3 sospecha di a horta na Boardwalk Hotel y Aruba Blue Village. A detene 1 sospechoso di ladronicia na Club Arias, 1 sospechoso di Dennis Bar, 2 sospechoso cu a horta na Hagemeyer, 2 sospecha di a horta na Sero Alejandro, 6 sospechoso di a horta den SAMS y 1 sospechoso di a horta den Gasa International.

 

Relaciona cu e casonan aki, a efectua 7 “huiszoeking” na Yucuri, Macuarima, Monserat, Aliviostraat, Balashi y na e warehouse di Pacifico Supermarket. A interoga 25 sospechoso, a traha 24 proces-verbaal “bevindingen”, a scucha 1 testigo y na final a entrega 3 “dossiers” na Ministerio Publico pa e casonan di Taat’s, La Granja y Esquire.

 

Di e forma aki por nota cu e ekipo di Polisnan investigativo tin mannan yen cu casonan andando. Ta obvio cu sospechosonan ta sigui purba, pero tambe ta obvio cu un cantidad di nan ta cay mesora den man di husticia pa responde pa nan actonan dilanti Hues. E mensahe di Polis na e hobennan aki ta: Crimen NO ta paga!

Top