Polis a logra pone man riba hoben cu arma di candela, mientras cu na mesun momento a tene un entrada hudicial, unda a haya varios articulo horta y 5 Venezolano ilegal

Ayera madruga pa 04.25 melding a drenta via Centrale Post cu tin un mucha homber bruin cortico cu un arma di candela dilanti BarABar.

Diferente patruya policial a bay n’e sitio y na nan yegada un persona a core bay. Durante un persecucion Polis a logra detene y tambe a tuma un arma di candela den beslag.

A transporta e sospechoso pa Warda di Polis pa mas investigacion.

Di acuerdo cu vocero di Polis, a haya un pistool preto cune.

 

ENTRADA HUDICIAL

Na mesun orario tambe Recherche Oranjestad a haci un entrada hudicial na un cas na Madiki. Nan tabata en busca di un sospechoso busca pa husticia, J. H. pa un caso di tiramento.

N’e cas na Madiki, nan a bin encontra varios artículo e.o. un bromer procedente di ladronisia, y a haya 5 ilegal Venezolano.

No a haya e sospechoso n’e cas mes, pero a bin detene na un otro cas na Ponton.

E 5 ilegalnan a wordo deteni sospecha di “mensenhandel y mensensmokkel” y a transporta nan tur pa Warda di Polis pa mas investigacion.

N’e entrada hudicial aki tambe Fiscal tabata presente.

Leave a Reply

Top