Polis no por confia mas y mester ta prepara Atracadornan di Hulpbestuurs Kantoor Savaneta tabata arma y hasta a los tiro

Vocero interino di Polis, sra. Liliana Rasmijn a relata exactamente con e caso di atraco di diabierne ultimo a tuma lugar, pa cual nos a publica varios foto.

T’asina cu pa mas o menos 3:30 di diabierna atardi Central di Polis ta haya un yamada cu ta bisa cu un atraco a cabi tuma lugar na Hulpbestuurs Kantoor Savaneta.

T’asina cu na yegada di Polis por a compronde cu total 3 hende homber cara no tapa y tur tres cu arma di candela a caba di atraca dos meneer cu a bin busca e placa di dia e momento ey (geld transport).

Un di nan a los un tiro na unda cu danki Dios no a alcansa nuin di dos di e meneernan aki.

 

Despues un un rato un yamada ta drenta na Central di Polis for di coleganan di Academia Policial Watty Vos, bisando cu nan ta tras di e atracadornan aki y na altura di Roy’s Hotel.

Nan ta wak e tres sospechosonan ta subi den dos diferente auto y nan a sali den direccion pabou. T’asina cu tur unidad di Polis a cuminsa cu e buskeda  di e atracadornan aki.

 

Na altura di Franse Pas ta para un Nissan March y na unda ta bay over na detene dos sospechoso. Tambe e mesun momento un otro unidad di Polis ta bin topa cu un Nissan Sentra patras di un cas na Pos Chikito.

Ey nan ta manda Polis Tecnico p’asina haci su investigacion y tambe ta tuma e auto aki den beslag.

 

Un rato despues na Sabana Basora un unidad di Polis ta para un Toyota Tercel y eynan ta detene e chauffeur y tambe tuma e auto den beslag. Total a detene 5 hende.

Den nan dos Arubiano y total 3 auto den beslag. E total di placa cu a bay cu ne ta mas o menos 30.000 florin.

 

Atraco Team ta sigui cu e investigacion awor.  Tambe Slachtofferhulp a presenta n’e sitio di e sucedido pa atende cu e personanan cu a wak loke a pasa y e dos victimanan di e atraco.

Cuerpo Policial kier a gradici tur e coleganan p’e bon trabou cu den un corto tempo a sa di yega y detene e sospechosonan.

Nos di Cuerpo Policial ta pidi ken cu por a wak algo yama tip lijn di Polis 11141.

 

 

Top