Polis ta expande su flota di auto pa por cumpli cu nan trabao

Durante un ceremonia cortico teni na Centro di Husticia na Santa Cruz, Cuerpo Policial Aruba (KPA) a ricibi e yabinan di dos pickup nobo nobo pa yuda combati criminalidad na nos fronteranan. E acto a tuma luga den presencia di Minister di Husticia, drs. mr. Arthur Dowers.

 

“Awe nos ta para akinan pa tuma e yabi di dos auto nobo den servicio di Cuerpo Policial. Den e caso aki ta autonan cu ta bay pa e departamento cu ta traha cu nos frontera o sea, aeropuerto y waf (Barcadera). Ta autonan cu ta bay den uzo pa patruya den vecindario di e facilidadnan aki. Naturalmente waf cu ta un tereno mas grandi como tambe na aeropuerto si mester atende cualkier incidente”, asina e mandatario a splica.

 

Minister Dowers ta sigui bisa cu na e fronteranan e trabao di Cuerpo Policial ta uno di implementa.

“Den otro palabra, no ta papia di prevencion sino implementacion, o sea, pone ordo y siguridad na nos fronteranan. Banda di e grupo aki tin un grupo mas grandi cu ta e martiu hudicial.

Nan ta traha realmente pa sigura nos fronteranan y e autonan aki ta bay yuda pa nos ta presente den tur skina”, e mandatario a enfatisa.

 

Alto Comisario interino, Vanessa Tjon a duna di conoce cu e ta hopi importante pasobra ta hayando dos auto cu por haci hopi bon uzo di nan, den e caso aki na departamento di Polis di frontera.

Nos tin experiencia cu autonan y sa cu pickup ta duradero. Bo ta mira cu nan ta bay mas largo cu otro autonan”.

 

“Nos lo haci sigur bon uzo di nan y na un bon manera. E departamentonan aki hopi biaha ta core cierto riesgonan mirando cu nan ta na frontera di e isla y hopi biaha nos mester facilita nan tambe cu e material cu nan mester”, asina e Comisario di Polis a agrega.

 

Cuerpo Policial Aruba ta masha contento cu e dos autonan nobo aki pa nan trabao na aeropuerto como tambe na Barcadera. E intencion di e dos pickupnan aki ta pa nan yega caminda cu e modelonan Hyundai Santa Fe, cu e departamentonan ey ta uzando ainda, no por yega.

Leave a Reply

Top