Politico cu mas voto ta drenta Parlamento

Ayera Parlamentarionan Dangui Oduber y Evelyn Wever-Croes a entrega e proyecto di ley pa cambia e sistema di Parlamento p’asina esnan cu mas voto drenta Parlamento.

“Un politico mester bisa loke e ta haci, y haci loke e ta bisa. Den Congreso di MEP na 2015 nos miembronan a pidi nos pa trece e cambio den sistema di Parlamento p’esnan cu mas voto drenta Parlamento”.

 

Dangui Oduber a traha riba e ley. El’a busca consehonan y Evelyn Wever Croes ta co-firmante di e ley.

Ayera t’asina leu cu nan a entrega e ley di iniciativa. Un danki na colega Dangui Oduber pa traha riba e ley, lider di MEP Evelyn Wever-Croes a duna di conoce.

E ley a wordo entrega na Presidente di Parlamento y Griffiernan di Parlamento y awor lo bay cana su caminda pa Raad van Advies pa wordo trata den Parlamento.

 

“Mi a wordo aserca pa hopi cuidadano cu a pidi mi pa trece un cambio den e sistema p’asina trece un mihor control di Parlamento riba Gobierno.

E gran mayoria di nos cuidadanonan ta desea e cambio aki. Pesey mi no por imagina mi cu por tin un Parlamentario cu por bay contra esaki.

Mi ta gradici lider di fraccion Evelyn Wever-Croes cu a para tras di e idea aki, y mi ta spera cu Presidente di Parlamento yama e reunion pronto. En todo caso nos a cumpli”, Dangui Oduber a finalisa bisando.

Top