Politikeria a cuminsa cu nombramento di 8 hende na DTP sin presupuesto

Actualmente cantidad di nombramento ta tumando lugar den Gobierno. Un Gobierno desespera cu sa cu nan no tin e opcion mas y cu nan no tin e posibilidad mas di haya un mayoria den e eleccion venidero.

Mike Eman ta tolera cu na Departamento di Transporte Publico (DTP), entre april cu mei (1 luna) 8 persona a wordo nombra cu un contract di 1 aña.

Sabiendo cu presupuesto di Aruba cu a wordo aproba recientemente den Parlamento ta indica cu presupuesto di e departamento y loke ta salario y ‘toelage’ pa aña 2016 tabata 1.8 miyon florin y pa 2017 e ta menos.

 

‘Pues mientras cu e presupuesto di salarionan ta menos den 2017 y 2016, ta mira cu 8 hende a wordo nombra den e departamento aki pa nombramento politico pa campaña. Esaki ta locual cu ta pasando den mayoria departamento den Gobierno n’e momentonan aki, Otmar Oduber a enfatisa.

DTP su agentenan no por actua contra taxi pirata, cual ta un problema cu semper tabatin y ta conoci cu ta Polis mester actua. Agentenan di DTP no tin autoridad pa actua contra A-nummers, Taxi pirata no ta carga un TX, O of B, sino A.

Masha tempo Minister di Husticia a priminti cu lo bay cuminsa actua, lunanan ta pasa y reunionnan ta tuma lugar sinembargo nada ta tuma lugar pa soluciona e problema di taxi pirata.

 

Buraco presupuesto pais Aruba 2018

Un Gobierno cu ya tin e pais aki den un situacion financiero dificil y ta mira cu practicamente no ta mira presencia di Minister encarga cu Finanza mas. Apesar di e debenan menciona anteriormente caminda ta papia di mas di 90 miyon florin den presupuesto di 2017, cu a bin for di pagonan ricibi di adkisicion di tereno y propiedad di Valero (cual otro aña no tey mas), mas pago cu mester tuma luga di e terminacion di hospital y green corridor cu ta suma na casi 55 miyon florin.

Ya caba ta mustra un buraco di 140 miyon florin riba presupuesto di pais Aruba pa 2018.

 

Prome Minister Mike Eman mester stop di broma ora pone luz den bario (cual ta derecho di un hende) y cuminsa splica pueblo con despues di 22 di september, ta bay paga e debe aki di mas di 140 miyon florin den presupuesto di pais Aruba y cu CFT a mustra riba e hecho aki.

 

Refineria mester a cuminsa opera na maart aña pasa, kiermen awe 1 aña y mei despues ainda no tin un bista cla di kico ta bay tuma lugar pa loke ta trata e refineria aki.

E 140 miyon ta sin tuma na cuenta entre otro, consecuencianan di benta di mercadeo di fuel cu no a tuma lugar ainda.
“Loke por wordo haci ta cu bo ta cambia bo voto y deposite den un partido nobo cu ta critica y cu ta para pa bon gobernacion cu ta bisa cu ta bay pone instancianan bek cu ta controla Gobierno. Duna nan bek e tools y personal necesario pa nan por controla y vigila Gobierno”, sr. Otmar Oduber a bisa.

 

Top