POR a conta cu gran sosten na entregamento di lista: 29 candidato cla pa sirbi Aruba a base di prioridadnan di comunidad

Diabierna partido Pueblo Orguyoso y Respeta (POR) a haci entrega di su lista di 29 candidato. E 29 candidatonan cu a postula nan mes pa representa plataforma POR den eleccion 2017 tur ta personanan profesional, dedica, cu pasion y determina pa sirbi comunidad.

Tur candidato tabata presente hunto cu famia, amistad y sostenedornan.

 

For dia cu a lanta E Forsa Nobo, e vision semper tabata pa enfoca riba e ser humano. Despues cu a reuni pa mas cu 3 luna cu diferente organisacion y instancianan den comunidad, a hinca un Plan di Accion den otro basa riba locual t’e prioridad di pueblo.

Basa riba e Plan di Accion a acerca mas y mas personanan pa forma parti di POR. Personanan cu e capacidad pa atende cu cada un di e preocupacionnan aki. Asina POR a logra sera un lista cu 29 persona capas di mehora e situacion actual.

 

Si tira un bista riba e contenido/calidad di personan cu ta riba lista di POR, mas cu 80% di e personanan ta hendenan cu pa prome biaha ta postula nan mes riba un lista politico. Personanan cu a laga nan interes personal un banda y a tuma e decision pa sirbi comunidad.

Entre e representantenan di POR pueblo por tin e confiansa cu tin personanan capas pa sirbi comunidad den tereno di salubridad, husticia, enseñansa, economia, finansa, turismo, derecho di nos muchanan, derecho di nos ancianonan, derecho di nos animalnan, deporte, cultura y adelanto di e ser humano den tur aspecto.

Top