POR a lansa hoben profesional Eromil Bakmeyer como candidato nobo riba lista

Diahuebs ultimo, durante di un encuentro cu prensa partido Pueblo Orguyoso y Respeta (POR) a lansa un candidato nobo riba nan lista, esta Eromil Bakmeyer. Esaki ta haci cu e famia di POR ta crece un tiki mas y awor ta consisti di 12 miembro.

Den e proximo 10 dianan lo ta presentando 4 candidato nobo di e plataforma.

 

Segun lider di POR Otmar Oduber, e ultimo 7 pa 8 simannan a combersa varios biaha cu Eromil. Un persona cu un curason enorme como ser humano y como tata di famia.

“Porfin a yega e dia pa cual mi ta sumamente contento di por anuncia Eromil Bakmeyer como candidato di partido POR E Forsa Nobo den e proximo eleccion 22 di september benidero. Locual cu a haci cu nos ta haya Eromil un persona asina importante pa uni riba lista di POR t’e hecho cu e ta un profesional hoben cu un experiencia amplio den Salubridad Publico.

Eromil ta studia na nivel di HBO y tin mas di 15 aña di experiencia den e ramo di salubridad. Actualmente e ta traha cu ‘dialyse pashenten’ y ta enfoca riba prevencion di e malesa aki y diabetes”.

 

Particularmente e aspecto di prevencion ta diferencia POR for di otro partidonan unda cu otronan ta dirigi nan mes riba e parti curativo.

POR ta kere den traha pa futuro y baha e cantidad di pashentnan cu ta sufri di e malesa aki a base di prevencion.

Banda di esaki Eromil ta para pa proteccion contra abuso di mucha den diferente sentido. Eromil Bakmeyer hunto cu un otro persona Jairo Maduro a percura pa mas cu 8000 firma wordo recauda y entrega na Parlamento na januari pa loke t’e tema aki.

 

Segun Otmar Oduber esaki ta un motibo extra pa cual a aserca su persona.

Eromil Bakmeyer: ‘Esaki tabata un proceso largo p’ami por a tuma e decision pa por ta sinta aki awe. Ultimo tempo mi a wak con e politica ta bay na Aruba y mi no tabata kier forma parti di esaki.

Mi ta kere den un politica nobo, mas integro y uno cu ta mas habri cu otro, pero tambe uno unda cu tin e espacio pa dialoga cu otro a base di respet.

Si ami ta bay para pa derechonan di mucha, nos mester siña nos muchanan kico ta respet mutuo, nos mester t’e ehempel y mester guia nan.

Mi ta un tata di 3 yiu y ta para pa nan, pero mi kier para tambe pa tur otro famianan. Mi ta considera mi mes un Rubiano di e pueblo aki y for di hoben mi a scoge pa sirbi un Aruba digno di prosperidad.

 

Awe mi ta boso dilanti cu e oportunidad aki cu mi a haya pa sirbi comunidad na un nivel un poco mas halto.’ Eromil ta enfatisa cu e kier hiba un politica sano, habri y uno unda cu nos ta respeta otro.

 

 

Programa Partido POR

Durante di e ultimo lunanan E Forsa Nobo a hiba e proceso di “bottom-up approach” pa yega na loke t’e programa di partido cual ta wordo lansa na final di juni.

Sinembargo otro siman diamars lo presenta algo inovativo den politica, caminda cu na un forma transparente y habri POR lo haci e plan di accion (cu ta keda un documento den proceso p’e proximo 6 simannan) conoci na comunidad di Aruba.

‘Lo duna e oportunidad pa tur hende sera conoci cu loke nos a haya como resultado a base di e mas di 70 grupo, instancia y otronan cu a reuni cu nan, pa por yega na un programa cu oficialmente ta wordo presenta na comunidad.

 

Leave a Reply

Top