POR a presenta programa di Revolucion Economico pa stimula economia di Aruba

Den cuadro di e “bottom-up approach” caminda cu ta reuni cu diferente instancia pa por yega na formacion di programa di partido Pueblo Orguyoso y Respeta (POR) pa e proximo gobernacion, recientemente a reuni cu Aruba Trade & Industry Association (ATIA).

A toca diferente tema e. o. crecemento economico di pais Aruba, balansa economico y medio ambiente.

 

“Importante pa nos tabata pa tende ATIA su puntonan pa cual mester bisa cu varios di e puntonan treci dilanti ta puntonan cu tabatin en comun. Locual a resalta un biaha mas, ta e aspecto di criminalidad cu mester wordo atendi cu ne.

Pa loke ta trata e oferta cu nos plataforma tin pa comunidad, POR ta basa su mes riba loke nos ta yama, revolucion economico caminda cu kier percura pa e homber chikito, comerciante y tur hende cu ta forma e comunidad aki, por mira un adelanto personal, y por mira den nan poder di compra tambe un adelanto significativo.

Basa riba mantencion di nos pilar economico turismo, posibel apertura di un refineria cu ainda nos no tin su futuro den nos man, pero tambe percura pa un diversificacion real. Caminda ta pone atencion riba revolucion economico basa riba “internet economy” hunto cu “research centers” aki na Aruba, hunto cu “incubators” y “startups fintech”, sr. Otmar Oduber a splica.

 

Asina por crea y capta un economia nobo cu ta desaroyando su mes mundialmente cu Aruba lo por ta e Pais den e area aki cu por atrae e tipo di negoshinan aki na Aruba y crea incentivonan fiscal pa inversionistanan local. Consecuentemente enbes cu tur cos ta bira mas caro (costo di haci negoshi y costo di bida), cu e economia nobo aki mester bay fomenta mas volumen y percura pa e comerciante ta “willing” pa inverti mas. Reduci su gastonan en bes di aumenta esakinan pa e tin mas disposicion pa inverti den e economia.

Di otro banda por crea un miho entrada pa e comunidad di Aruba, e clase trahado y e mas di 60% di nos hendenan cu ta biba awe bou di e “bestaansminimum” cu tin pa por biba un bida di calidad aki na Aruba.

“E temanan aki cu nos lo elabora den e programa di partido, sigur a capta hopi atencion na ATIA y lo sigui desaroya esaki den futuro”, Otmar Oduber a finalisa bisando.

Top