Por entrega nominado pa Copa Hubenil Gobernador Felipe B. Tromp

Celebracion di nos Dia Nacional ta tras di lomba y por a constata e gran cantidad di boluntario cu a traha pa haci e celebracion exitoso sea riba tereno social, cultural of deportivo.

Trabou boluntario ta hopi importante pa formacion di un persona, specialmente ora nos ta traha cu hobennan.

Pa reconoce e trabou boluntario, anualmente ta haci entrega di Copa Hubenil Gobernador Felipe B. Tromp na un hoben of organisacion hubenil cu a destaca durante e ultimo aña.

 

E periodo mester ta di 1 di april 2016 te cu 31 di maart 2017. Edad 6 te cu 20 aña.

E comision ta enfatisa cu e logronan no mester ta solamente premionan cu por a gana, pero tambe si e hoben of e grupo durante henter aña a desplega actividadnan exitoso riba un tereno specifico.

Actualmente e copa ta den poder di e hobennan di Arubaanse Padvindsters Gilde. Nan a gana e copa pa nan meritonan riba tereno social y cultural; cursonan pa nan miembronan, proyectonan pa hende grandi, participacion na eventonan di recauda fondo, actividadnan protocolario etc.

 

Ultimo dia pa entrega nominado lo ta dialuna 18 di april 2017. Por haci esaki personalmente na oficina di Asociacion Trabou pa Hubentud na Caya Appeldam na Dakota of manda via mail athaaruba@gmail.com of nilda_koolman_131@hotmail.com

Nominadonan por ta un grupo cultural (baile, canto, musica etc.), organisacionnan caricativo, scolnan, gruponan di deporte etc. of hobennan individual cu a destaca riba un di e terenonan menciona.

Den caso di grupo of organisacionnan e miembronan mester ta hoben, trahando bou guia di adultonan.

 

Proximamente lo habri e face book page di Copa Hubenil Gobernador Felipe B. Tromp cu informacion e.o. di e grupo y personanan cu den pasado a gana un premio.

Comision ta spera cu e aña aki atrobe, lo ricibi hopi nominado p’asina por reconoce e trabou boluntario den nos comunidad.

Top