POR lo bin cu programa na scolnan y espacio publico pa conscientisa riba medio ambiente

Pa loke ta Naturalesa y Medio ambiente cu tambe ta un preocupacion grandi den comunidad, Pueblo Orguyoso y Respeta (POR) ta indica den su “Plan di Accion” cu lo traha riba diferente aspecto. Pa loke ta legislacion y maneho, lo reforsa y amplia ley pa proteccion di naturalesa (“Natuurbeschermingsverordening”).

Finalisa, aproba y implementa un maneho integral di naturalesa y medio ambiente den consulta estrecho cu tur stakeholder.

 

Tambe lo finalisa y publica lista di especie protehi, mehora control y sancion pa infraccion di nos leynan riba tereno di naturalesa y medio ambiente. Ancra den ley tratadonan internacional (manera Ramsar convention).

 

Soluciona problema cu dumpnan

Pa loke ta encera problema di dump Parkietenbos y dumpnan ilegal, POR ta propone cu dentro di 100 dia cu asumi responsabilidad gubernamental lo bin cu un solucion definitivo pa dump na Parkietenbos haciendo uzo di companianan local y tecnologia moderno y proba di reciclahe y di converti sushi den energia (“waste-to-energy”).

Den cuadro di esaki tambe lo identifica y elimina dumpnan ilegal, mehora control y bin cu sancion pisa pa esnan cu ta comete infraccion.

 

Lo implementa principio di bon gobernacion (“good governance”) y transparencia cerca tur organisacion activo den sector medio ambiental cu ta ricibi fondo di pais Aruba como tambe sostene y duna oido na e organisacionnan aki.

 

Marine Park

Establece un Marine Park y ancra den ley areanan protehi teniendo na cuenta e balansa entre proteccion di naturalesa y medio ambiente marino como tambe actividad economico.

Banda di esaki lo implementa un maneho di cuido y mantencion di nos playanan.

Restablece ordo y structura na nos playanan y mehora nan calidad.

 

Control y sancion tambe ta sumamente importante p’asina percura cu realmente ta cumpli cu e leynan cu ta regards protection di nos naturales y medio ambiente.

Lo controla y sanciona tur compania cu ta haci daño na nos medio ambiente riba tera y den lama y reforsa Bureau City Inspector.

Riba tereno di energia alternativo, ta continua cu ubicacion di panelnan solar na scolnan y amplia e proyecto aki pa edificionan di Gobierno tambe crea y implementa un programa di incentivo pa stimula produccion y uzo di energia alternativo.

 

Conscientsacion

E aspecto di conscientisacion di comunidad riba cuido di medio ambiente y naturalesa ta esencial. Lo conscientisa comunidad por medio di un campaña educativo na scolnan como tambe den espacio publico riba diferente tema (manera reciclahe y uzo di energia consciente).

Como parti di esaki tambe inclui conocemento di nos herencia natural, flora y fauna, agricultura y pesca den curiculo di scol. Mehora y promove uzo di transporte publico pa reduci uzo di auto priva y stimula uzo di material degrabadel.

 

Proteccion di nos flora y fauna

Implementa condicionnan estricto pa locual ta encera rosamento di tereno pa asina salvaguardia nos flora y fauna (incluyendo e parti maritimo), implementa programa di restauracion di nos flora y fauna, stimula plantacion di matanan local (incluyendo mangel) pa contraresta e impacto di rosamento di tereno, inicia proyecto pa stimula crecemento di coral y tambe implementa programa di cria pa fauna local (manera shoco, prikichi, coneu y calco).

 

Esakinan ta parti di locual cu POR ta propone den e “Plan di Accion” p’e proximo gobernacion riba tereno di Naturalesa y Medio Ambiente. Nos kier tende di bo ideanan y feedback p’asina nos por yega na un plan di gobernacion definitivo cu lo wordo presenta otro luna.

 

Bo por manda bo feedback riba info@forsanobo.com y si bo kier lesa e “Plan di Accion” por registra y download esaki riba forsanobo.com of bishita e pagina di Facebook di POR E Forsa Nobo, unda bo lo haya e link.

Leave a Reply

Top