POR lo bin cu un revolucion economico creando un mihor futuro pa nos comunidad den su totalidad

Otmar Oduber di POR, E Forsa Nobo a lanza e pensamento di un revolucion economico na Aruba.

Den e cuadro aki e ta bisa cu Gobierno mester baha su gastonan y un forma cu a wordo proba pa logra e meta aki ta dor di independiza departamentonan manera ATA, ANSA y Scheepvaart caminda no ta perhudica e trahador, al contrario, e ta sali gana, mientras cu ta reduci gastonan di Gobierno.

 

Di otro banda ta percura pa haya entradanan pa deficiencianan grandi cu nos tin manera ta educacion, salubridad, vivienda y seguridad.

Pa logra esaki mester percura pa tin un plan integral cu POR lo ta presentando y tin e number di Revolucion Economico.

E plan aki ta inclui un cantidad di inovacion riba diferente tereno manera t’esun momentario riba cual lo ta reuniendo cu diferente instancia local pa haci posibel cu e restriccionnan cu tin n’e momentonan aki pa hendenan por haci pagonan via internet y electronico por keda reduci.

 

Ademas di esaki mester prepara e ley y instrumentonan necesario p’e ‘Sharing Economy’ por ta beneficioso pa Pais Aruba. Mescos pa conceptonan di ‘start-ups’, prepara pa tin incentivonan fiscal pa move p.e. di un free zone cu awe ta depende di container pa uno nobo, moderno,  tecnologico pa atrae di tur rond mundo companianan cu kier pone centronan di investigacion, cu kier crea edificionan di start-ups na nos isla.

 

Esaki ta crea cu no solamente ta bin cu un cantidad di profesional, exportando un economia di conocemento, pero principalmente ta crea un berdadero oportunidad pa nos yiunan di tera cu awor ta studiando den exterior pa bin bek nos isla.

Dor di crea e tipo di economia aki rond di e revolucion economico cu POR ta para pe lo crea e oportunidadnan p’e hobennan bin bek Aruba cu tur e consecuencianan positivo cu esaki ta trece cune.

 

Un economia cu salarionan mas halto, cu entradanan mas halto y cu ta contribui asina tambe n’e fondonan di pensioen y n’e fondonan di AZV haciendo di nos economia uno mas bibo.

Oduber a bisa cu ta papiando cu expertonan den e ramo tambe pa banda di incentivonan fiscal crea tambe otro incentivonan pa pusha e revolucion economico aki cu ta basa riba e filosofia di e ‘4th Industrial Revolution’ cu ta ensera e parti digital, e parti teconologico.

Intencion ta pa crea un economia cu ta wordo pusha p’esnan cu ta crece logrando un mihor porvenir pa nos comunidad den su totalidad.

 

 

Top