POR tin un lista cu profesionalnan cla pa tuma decisionnan na bienestar di comunidad

Dialuna anochi den un sala completamente yen, e homber y muhernan balente cu pa lunanan largo a bin ta campañando fuertemente pa partido POR a reuni cu candidatonan durante un reunion di Conseho di Partido extraordinario.

A reina un ambiente yen di energia y positivismo durante e reunion unda a resalta e forma nobo cu POR ta campaña. Sigur un campaña unda cu na diferente ocasion POR tabata un ehempel pa partidonan ya existente pa hopi aña.

 

For di e forma cu a scoge pa yega na e informacion pa e plan di gobernacion por medio di encuentronan y reunionnan cu gruponan representando nos comunidad y ricibiendo feedback di miles di ciudadanonan te na e comportacion di cada sostenedor di POR.

E formacion di e lista di partido tambe a bay na un forma diferente cu otronan pasobra en bes di yena lista basa riba popularidad of grandura di famia di un of otro persona, a busca personanan cu ta profesional y capas pa soluciona e retonan cu comunidad a indica cu mester soluciona.

Ta haci peticion na lider di otro partidonan pa nos por sigura cu e ultimo dianan cu nos tin nos dilanti nos por hiba un campaña na nivel, limpi y transparente.

 

Pa dia 22 di september ta brinda e oportunidad na comunidad di Aruba pa eherce nan derecho di voto. A mira hopi atake sin base tuma luga e ultimo lunanan aki y cu no ta trece nada nobo p’e discusionnan relevante pa e necesidadnan cu comunidad tin. Tur ta tabata dirigi rib’e aspecto personal y sin prueba, cual nos a bisa semper di lo no bay perde tempo pa responde riba cada un di esakinan. En bes, ta enfoca riba e plan di gobernacion cu POR tin pa resolve e diferente retonan den comunidad.

POR tin un lista cu profesionalnan cla pa tuma e decisionnan den e proximo Gobierno y percura pa ehecucion na bienestar di nos comunidad, a base di e strategianan cu ta poni den Vision 17-21 Hunto Nos Por.

 

Palabranan di danki ta bay na cada persona cu di un of otro forma a bin ta contribuyendo na haci di POR E Forsa Nobo dia 22 di september.

Top