Practica di prostitucion den Playa, ta bolbe lanta cabez

Ultimamente por nota cu practica di prostitucion ta lentando cabez atrobe den Playa. Recientemente Warda nos Costa a haci un entrada hudicial den un bar den Playa, cu ta keda practicamente den bista di Polis.

Awor tin hende, cu aparentemente ta gusta e ambiente aki, a laga sa cu esaki no ta nada nobo, ya cu den pasado, hopi t’e sitionan den Playa, cu tabata dedica n’e practica aki di trece prostitucion Aruba.

 

Di acuerdo cu ley, e unico sitio cu ta permiti pa trece personanan cu kier practica e ofishi mas bieu, ta San Nicolas, pero despues di siere di Lago en particular e negoshi aki a cay formalmente y por a sinti cu hopi di e damanan aki a muda nan operacion e.o. den casinonan local y tambe den Oranjestad. El a ser combati fuertemente, pero manera señala, awor e ta lantando cabez atrobe den Playa.

 

Manera menciona, e unico lugar cu ta permiti pa tin practica di prostitucion ta San Nicolas, por lo demas, ningun parti mas na Aruba.

Pesey di biaha e pregunta, dicon no tin accion contra di sitionan cu tog e practica aki ta tumando lugar?

Loke ta masha yamativo, si na San Nicolas tabata conoci pa trece prostitute for di Colombia, awendia tin hopi mucha muher hoben y bunita cu ta bin for di Venezuela, sin ningun clase di control medico, pa practica e profesion di mas bieu na mundo.

 

T’e unico forma pa haci placa na granel. Asina mes, Minister di Estranheria, Benny Sevinger ta garantiza cu husticia ta garando e personanan aki y nan ta wordo deporta inmediatamente.

Hopi di e casonan aki tin di haci cu traficacion di hende, contrabanda di hende, cu ta castigable na Aruba.

Esnan cu ta coopera cu e parti aki por haya castigo di prison mes, pero te awor, ningun hende a ser sentencia p’e delito aki.

 

Es mas, den un bar den Oranjestad, ta meramente un señora Colombiana cu ta maneha e bar, ta atrae e damanan Venezolano pa haci e trabao, pero e ta cana liber, manera nada a pasa y di acuerdo cu nos informacion lo sigui busca “cargamento” nobo.

Pero no ta solamente dicho señora ta haci malo, pa trece e muhernan aki pa ser explota na Aruba, pero nos mesun hende hombernan ta haci uso di e damanan aki, treciendo nan mes den peliger y pa cu nan famia.

 

No ta solamente na Aruba, pero loke cu nos ta denuncia aki ta tumando lugar practicamente na tur isla den Caribe, segun Minister Benny Sevinger, debi n’e situacion reinante na Venezuela. Ta di spera cu esnan di husticia, lo sa di haci nan trabao y pueblo por ta sigur, cu lo sa di deporta tur esnan cu ta ilegal aki y lo persigui esnan cu ta dedica n’e negoshi di contrabanda y trafico di hende muher.

Top