Premier Rutte masha positivo cu oportunidadnan cu relacionnan den Reino ta brinda “Aruba ta cana dilanti den inovacion”

DEN HAAG- Minister President Mike Eman y su colega Juan David Yrausquin a subi e trapinan di ‘Het Torentje’ unda Premier Mark Rutte tin su oficina pa reuni cu ne riba varios topico cu ta regarda Aruba y e relacionnan den Reino.

Rutte a bisa na final di e reunion cu e encuentro tabata uno bon.

 

“Mike y ami ta colega pa hopi tempo caba. Mi tin un aprecio grandi p’e forma con na Aruba e semper sa di dirigi e asuntonan den bon direccion. Ta pesey mes tambe cu mi ta dese’e tur clase di exito den e eleccionnan na luna di september na Aruba”.

Premier Rutte a splica cu awor cu na Hulanda eleccionnan ta tras di lomba, nan ta den e fase unda ta sondea posibilidadnan di un coalicion.

Ainda no a tene ningun reunion cu contenido entre partidonan.

 

“Pero, mi ta sigur cu ora esakinan cuminsa, cu e relacionnan den Reino ta forma un parti esencial di e reunionnan aki.

Mike y ami ta di opinion cu nos mester amplia e relacionnan, cu nos mester papia con nos por traha hunto riba cambio di clima, transicion di energia y con hunto nos por usa y uni e forsa inovativo di Hulanda, pero tambe di e partinan Caribense di Reino.

Aruba ta cana dilanti, TNO a establece su mes eynan y Mike a organisa algun tremendo conferencia. ”

 

Pa Mark Rutte e relacionnan den Reino ta importante p’e historia unico cu e partinan ta comparti cu otro.

“Pa por pensa cu un economia mediano/grandi den Europa Occidental tin un relacion asina fuerte cu e region Caribense ta algo apart. Historia a trece nos hunto y e relacion ta trece cu ne oportunidadnan unico.

Hulanda como portal na Europa p’e islanan di Caribe y di otro banda e islanan por fungi como un brug entre Hulanda y Central y Latino America. Asina ta cu di ambos banda e posibilidadnan ta enorme.”

 

Top