Premio Excelencia den Deporte Aksel Samardzic y Renze Postma a bira Aruba su Deportistanan di Aña 2016

Diabierna anochi Ministerio di Deporte cu sosten di Lotto, e loteria di Aruba a honra nos atletanan cu mas a destaca den e aña deportivo 2016.

Den e ballroom di Aruba Marriot Hotel and Stellaris Casino, e atletanan cu mas a destaca a ricibi nan galardon durante e prestigioso ‘Premio Excelencia den Deporte 2016’.

E aña aki tabata di e 14 aña cu a organisa e magno evento Premio Excelencia den Deporte, un evento cu a sirbi como muestra di gratitud, reconocimento y estimulo cu ta duna n’esnan cu a destaca den mundo di deporte.

 

Un total di 22 federacion a nomina nan 71 mihor atletanan, esaki t’e manera di reconoce e trabou duro y e sacrificio cu cada atleta ta haci pa cada dia bira mihor den nan deporte.

Ta obvio cu e atleta aki ta logra triunfa den eventonan deportivo local y internacional y mas cu claro e federacion ta masha orguyoso di por nomina cada un di nan atletanan e anochi aki.

Tur federacion di deporte y nan miembronan ta traha duro na bienestar di e deporte y nan atleta. Un mas cu otro a logra acapara gran atencion unda e deporte ta sigui crece y logra bon resultado na final, cual tambe ta e meta di tur federacion.

 

Den e categoria Atleta di Aña Local y Atleta di Aña Internacional a toca e honor un bes mas na Renze Postma kende a logra sali pa di tres biaha consecutivo e Atleta di Aña Local, mientras den e categoria Atleta Internacional di Aña, e hungador di beach tenis, Aksel Samardzic representando Aruba Lawn Tennis Bond a keda eligi como a maximo ganador di e evento Premio Excelencia den Deporte 2016.

 

Un palabra di pabien na tanto Renze Postma y Aksel Samardzic cu nan premio como e atletanan di aña 2016 di Aruba. Nos lo bin cu mas di e evento Premio Excelencia den Deporte 2016 unda nos lo tin e ganadornan Infantil y Hubenil.

 

Top