Premionan relata na Aruba Caiso & Soca Monarch 2017 a wordo entrega Stichting Musica a demostra cu e musiconan ta keda na prome luga pa nan

Riba diaranson 15 di februari 2017, na Centro di Bario Brazil, Stichting Musica a entrega e premionan monetario na e ganador y finalistanan di Aruba Caiso & Soca Monarch 2017.

Tur compositor y areglista envolvi tambe a ricibi un reconocemento y premio durante di e anochi e ganadornan di e premio pa “Best Costume” y “Best Dressed Band” a wordo anuncia.

E maestronan di ceremonia, Ruben “Scorpio” Garcia y Maicky “Campo” Oliva percura pa un ambiente ameno y chistoso.

 

Presidente di Stichting Musica, sra. Edwina Werleman a ricibi esnan presente cu un palabra di bon bini, na unda el a expresa su satisfaccion cu e resultado y acogida di e festival.

Den nomber di e directiva completo di e fundacion, sra. Werleman a gradici e patrocinadornan cu a haci e cuater anochi di Aruba Caiso & Soca Monarch 2017 posibel.

Hunto cu Setar, Aruba Bank, Aruba Airport Authority, Aruba Tourism Authority, Gobierno di Aruba, Johnsons Enterprises, K&G Boutique, Tropical Bottling Company, Ecotech y King Ocean e festival tabata un exito.

Tambe el a gradici su colaboradornan Purple Entertainment Group, cuerpo di seguridad Whooz Next Security, cuerpo di hurado bou maneho di sr. John Hassell, cuerpo di boluntario, KPA y e stage management team di Ananse Creative Productions cu tabata entre esnan cu a percura pa Aruba Caiso & Soca Monarch 2017 ta organisa riba un nivel profesional.

 

Sra. Werleman a expresa gratitud profundo pa tur medio di prensa y radio emisora en general y specialmente esnan cu a transmiti e festival tur cuatro anochi “live”.

Tabata un gran honor pa Stichting Musica di por a traha hunto cu prensa y Stichting Musica ta desea di sigui traha hunto den forma estrecho pa duna tur musico, como nos gran artistanan di Aruba, e oportunidad pa nan cancionnan por wordo toca no solamente durante e temporada di Carnaval, pero tambe carga nos artista y bandanan durante henter aña.

Stichting Musica a urgi e musiconan presente pa uza e oportunidad pa relaha y refleha riba nan participacion y pa semper mantene e union necesario e. o. pa sigui aporta na Carnaval di Aruba y e festival den forma positivo.

 

Siguidamente sr. John Hassell, presidente di hurado di Aruba Caiso & Soca Monarch 2017 a duna splicacion amplio rib’e Roadmarch Contest, con esaki ta wordo huzga y di cual ganador lo wordo anuncia e prome dialuna despues di e paradanan di Carnaval 63. E contest aki ta basa riba e popularidad di e cancionnan den comunidad y durante di e paradanan.

Sr. Hassell a indica cu e votacion lo tuma luga pa medio di un sondeo entre tur radio emisora, conhuntamente cu un panel di hurado independiente cu ta distribui riba e ruta di e siguiente paradanan: Lighting Parade, Parada di Luz, Parada Grandi San Nicolas y Parada Grandi Oranjestad.

 

E Roadmarch Contest, popularmente conoci como “Roadjam”, ta wordo sosteni pa Aruba Bank NV. Aruba Bank ta un banco netamente Arubiano, cu ta fielmente sostene e celebracion mas grandi di nos cultura, cual ta Carnaval, bao di e pensamento cu cultura ta e manera di biba cu nos a wordo bendiciona cu ne y cu ta forma e pilarnan di nos comunidad.

E anochi a sigui cu e anuncio di Best Dressed Band, cu a keda den nomber di e banda Buleria.

E puntuacion a wordo basa riba e originalidad / impacto causa den publico, uniformidad di e banda completo y e tema Carnavalesco of relata na e composicion. Buleria a score halto den e ultimo categoria, uzando “cover all” color oraño relata na e tema di e Caiso titula “Kooyman y Bohama”.

Chantal “Queen Chanty” Quant, cu a wordo acompaña riba escenario pa e banda OREO, a sobresali cu su costume sumamente bunita acaba y pa e motibo aki a gana e titulo di “Best Costume”. E competencia den e categoria aki tabata fuerte, sinembargo e costume di Queen Chanty a destaca riba escenario y tambe riba potret y pantaya di television na un modo spectacular.

 

Sr. Chibi v/d Hans di e revista carnavalesco “Bachannal” a entrega un aprecio na cada finalista y ganador, den forma di un potret di cada un durante di nan presentacion riba escenario.

Algo cu e cantantenan sigur a aprecia di e revista renombra aki, cu ta den cumpli 20 aña riba mercado.

Na final di e anochi tur cantante, compositor y areglista a wordo yama dilanti pa asina ricibi nan cheque y plakaat di parti Stichting Musica. Sra. Shahaira Labad tabata un di e personanan encarga cu e entrega di premio, representando SETAR NV, cu manera ta conoci ta haci un contribucion substancial na Carnaval di Aruba pa añanan largo.

SETAR N.V. a duna di conoce cu nan ta contento di por duna nan aporte na Stichting Musica y Aruba Caiso & Soca Monarch 2017 y ta kere cu e canticanan cu ta keda crea pa cu e festival aki ta hunga un rol importante pa e exito di nos Carnaval y tambe pa historia di Carnaval di Aruba.

 

Stichting Musica a enfatisa cu nan ta considera e musiconan e actornan principal di Aruba Caiso & Soca Monarch y ta sumamente orguyoso di por a cumpli cu e entrega di premio dentro di un siman y mey despues di e anochi final, pa demostra cu pa e fundacion, e musiconan ta keda na prome luga. E organisacion a expresa cu nan tin confiansa den e ganadornan pa carga nan titulo den forma digno, como representantenan di Caiso & Soca Monarch y como figuranan publico cu ta wordo admira dor di grandi y chikito, y asina contribui na tene e imagen y balor di e festival y Carnaval di Aruba na halto.

Top