Preparacion ta den full swing pa Fiesta Rotaria 2017 organisa pa Rotary Club of Aruba

 

Miembronan di Rotary Club of Aruba ta den full preparacion pa e popular Fiesta Rotaria cu lo tuma lugar dia 2 di april. E aña aki tambe Fiesta Rotaria lo tuma lugar na e parking lot di Stadion Guillermo Trinidad. E porta nan lo habri pa 10’or di mainta y manera tur aña ta spera un multitud grandi di trempan caba.

 

Na Fiesta Rotaria lo tin diferente stands na unda e publico presente por cumpra diferente articulo na hopi bon prijs. Lo tin un seccion di “hardware” y articulonan pa cas.

Tambe lo tin un stand special pa computer y articulo eletronico. E aña aki tambe tin e posibilidad pa cumpra bo matanan. Esaki ta un stand sigur hopi popular. Den e seccion di supermercado lo tin diferente comestibel na benta. Pa tur gusto lo tin algo sigur na Fiesta Rotaria.

Lo tin stands na unda por cumpra buki, joyas y paña. Boluntario y miembronan di Rotary Club of Aruba lo ta cla pa yuda.

Adicional lo tin un seccion special pa nos mucha nan cu diferente actividad manera diferente dino jumps. Bo por pasa purba bo suerte na e “wheel of fortune”, na unda pa un prijs hopi atractivo bo tin chens di gana diferente premio.

 

Bar y cushina lo ta bon surti cu diferente stands di cuminda y bebida. Manera tur aña Rotaract Club of Aruba lo tin su stand di “Aruban Delights” cu e famoso sanger yena, pastechi, kroket y cosnan dushi manera bolo, batido di fruta y lemonade.

Fiesta Rotaria ta programa pa caba 6’or di atardi. Durante dia lo tin diferente entretenimento pa tur esnan presente. Ja a confima caba tres banda cu lo duna un presentacion. Esakinan ta Le Groove, Buleria y D’-Licious.

 

Na final dia Fiesta Rotaria lo saca e premionan di e rifa cual ya ta bon conosi pa nos comunidad Pa solamente Afl. 25,- pa ticket bo por gana un di e 12 tremendo premio nan ku como prome premio un Suzuki Gran Vitara nobis nobis. E bukinan di rifa ya ta obtenibel cerca tur miembro di Rotary.

Presidente Stanley Looman ta comenta cu e preparacionnan ta bayendo hopi bon y kier a invita e comunidad di Aruba pa pasa Fiesta Rotaria cual ta e evento di mas grandi di Rotary pa recauda fondo. E fondonan aki lo wordo reparti entre diferente fundacionnan y organsacion den nos comunidad.

Top