Presidente di FIFA, Gianni Infantino: A triplifica inversion den futbol mundial pa desaroya proyectonan

 

Presidente di FIFA, Gianni Infantino tabata presente pe di 32 congreso di CONCACAF teni diasabra ultimo na Aruba.

“Pa cuminsa mi ta contento di ta aki. Aruba ta un luga bunita, un luga cu bo ta desea di pasa mas tempo cu na luga di bin pa un congreso so, pa reunion di trabou, pero pa disfruta”, asina Infantino a remarca.

 

E Preidente di FIFA a keda impresiona cu e forma con tanto e Minister como e asociacion di futbol a ricibi’e. E trabou bou encargo di Richard Dijkhoff, Presidente di Arubaanse Voetbal Bond, ta bayendo bon.

“E congreso aki ta mustra cu CONCACAF ta bayendo bon, riba un caminda nobo. Riba un caminda cu ta enfoca bek riba e cosnan necesario y na balor corecto. Bon gobernacion combina cu bon habilidad y transparencia. Algo cu ta bon pa futbol”, Infantino a remarca.

 

Gianni Infantino ta Presidente di FIFA un tiki mas di 1 aña y ainda e tin 2 aña mas pa bay, pero su vision pa futbol ta cu FIFA tin eventonan cu lo tuma luga den e proximo 2 añanan.

“Lo tin Copa Confederacion, Copa Mundial otro aña, pero prome cu esey na Bahamas lo tin e Copa internacional di beach soccer”, el a remarca.

Tambe lo tin eventonan na India y na Korea. Na caminda tin hopi proyecto pa desaroya y nan a triplifica inversion mundial den futbol. Prioridad principal di FIFA ta pa inverti den futbol pa futuro.

 

Loke Aruba por spera di FIFA pe proximo añanan ta e sosten y compromiso di traha hunto.

Pero tambe e compromiso di inversionnan y compromiso pa hunto desaroya futbol, ta algo cu mester haci. “Pero cu e asociacion di futbol (AVB) y Gobierno di Aruba nos ta na e mesun liña”, asina Infantino a duna di conoce.

Top