Presidente di FIFA sr. Gianni Infantino: “Henter comunidad futbolistico di Aruba por conta riba mi”

 

Despues di e exitoso congreso di CONCACAF na Aruba, Prome Minister Eman tabatin un encuentro den su oficina cu Presidente di CONCACAF Victor Montagliani, Presidente di FIFA  Gianni Infantino y hunto cu un delegacion chikito. Despues di esaki sr. Infantino a bisa cu nan a papia di futbol, con sigui desaroya futbol na Aruba y hiba futbol den henter comunidad.

 

“Mi ta testigo di e pasion di boso Prome Minister pa loke ta futbol y loke ta tambe un refleho di e pasion di henter e pais. Esaki ta tremendo pasobra pasion ta e base di loke nos mester ora nos di FIFA kier desaroya futbol, cu ta nos mision primordial. Tin algun proyecto di futbol masha prometedor aki na Aruba, entre nan e veldnan chikito di futbol den barionan.

Tambe beach futbol ta un otro proyecto y asina tin hopi mas cu nos por traha hunto riba nan y coopera pa asina trece alegria pa henter e poblacion. ‘Because futbol is the most magical sport in the world'”, sr. Infantino a expresa.

 

Sr. Infantino a splica cu mas di un aña pasa e tabata na Aruba ora e tabata campañando pa presidencia di FIFA.

“Mi a topa cu President di AVB, mi amigo Richard Dijkhoff, kende ta haciendo un trabou fantastico. Mi ta masha contento di por ta bek aki na ocasion di e congreso di CONCACAF. Tambe pa topa Richard y papia cu Prome Minister Eman y brinda sosten na nan den desaroyo di futbol aki na Aruba. E trabou haci dor di AVB ta algo fantastico, hopi structura y hopi profesional den un ambiente cu no semper ta facil dor di varios retonan.

Pero AVB a supera nan tur pa cual mi por bisa di ta orguyoso di ta un amigo di AVB y Richard. E y henter e comunidad futbolistico por conta riba mi mescos ami por conta riba nan y hunto nos por haci cosnan grandi”, asina sr. Infantino a sigura.

 

Presidente di FIFA a regala Prome Minister Eman un T-shirt di FIFA cu nr. 9 riba dj’e y un banderin di FIFA. Prome Minister a regala ambos Presidente un replica di un cas estilo Arubiano y a splica nan con e casnan aki antes tabata wordo construi, sin tecnologia moderno, pero uzando logica logrando e miho beneficionan cu naturalesa tabata ofrece nan.

Leave a Reply

Top