Presidente di Parlamento en conexion cu Dia di Mama: Diferente cambio positivo pa sostene nos mamanan y ainda falta mas

Diadomingo ta dia di mama. Un dia cu ta ser celebra desde siglo 19. E Mericano activista social Anna Jarvis (1864-1948) di Philadelphia a logra cu Gobierno a fiha un dia oficial pa honra mama. Despues celebracion di e dia a ser comercialisa.

 

Segun Presidente di Parlamento e dia aki no solamente ta un dia di festeha sino tambe un dia pa nos para keto un rato na e rol importante cu un mama tin.

E rol aki tabata mas bien di cuido y educacion di su yuinan, aunke e mama di awendia su rol ta tambe di busca entrada pa cria su famia. Pues su rol a bira mas pisa.

Aunke den cierto caso e tata ta sostene e mama den e rol como educador.

En bista di e rol importante aki ta necesario pa sostene e ser femenino-mama.

 

Wyatt-Ras ta contento cu como Parlamentario e por a contribui na diferente cambio di ley pa fortifica e ser femenino-mama. A cambia nos Codigo Penal y proteha derecho di mama contra e. o. abuso sexual den matrimonio. A traha riba e ley di stalking. Como iniciador a trece cambio den e ley di malesa y di seguro social y a prolonga e asina yama verlof di embaraso y parto y mamanan a haya oportunidad pa cria nan yiu cu pecho of kolf na pia di trabou.

 

Durante 9 luna e mama cu ta traha tin derecho ariba 2 ora di cada dia di trabou pa bay cas cria su baby. Esaki ta un adelantio grandi pa e mama cu por ta mas tempo cu su baby recien naci, contribuyendo asina na prevencion.

Gobierno a introduci trei merdia tambe esun pa hobennan, dunando mamanan cu ta traha mas opcion pa por garantisa cuido y guia di nan yiunan.

Pronto Parlamento lo aproba e ley di centronano di cuido di mucha (ley di crèche).

E ley aki lo reglamenta e centronan di tal forma cu mayornan lo por ta trankil cu ora nan ta trata tin lugarnan y profesionalnan cualitativo cu ta cuida nan yiunan.

Tambe Gobierno a duna famianan e schoolkinderentoeslag.

 

Wyatt-Ras a mira bek riba diferente logronan riba tereno legal, sin embargo mester haci mas ainda. Nos tin cu keda traha riba cambio di mentalidad di nos comunidad y dunadornan di trabou pa mira mas e importancia di un trahador femenino pa su yiunan y su cas. Tene mas cuenta cu ne ora tin yiunan cu tin un of otro problema y ofrese e posibilidad di guia of terapia.

Ademas ta di importancia pa tene cuenta cu e orario di trabou especialmente di mamanan soltera p’asina nan por atende cu nan yiunan desaroyo.

Wyatt-Ras ta señala cu tin varios desaroyo positivo den bienestar di e mama y cu ainda falta.

Top