Presidente di Parlamento: Husticia mester haci mas pa garantisa trankilidad den nos hogarnan

Den un bijeenkomst cu a dura mas o menos 5 ora Parlamentarionan di diferente fraccion a haci nan preguntanan critico na minister di Husticia mr drs. Arthur Dowers encuanto criminalidad na Aruba.

 

E reunion aki a ser pidi dor di fraccion di AVP basa rib’e diferente atraco di ultimo simannan cu e meta pa haya un update di informacion, accionnan y cifranan di combatimento di criminalidad. Minister a trece padilanti cu no ta di awor criminalidad ta pidi atencion. El a menciona un rapport ya caba di aña 2007.

 

Durante ultimo dianan criminalidad a haya un diferente angulo. E forma con atraconan ta tuma lugar a cambia. Tin 14 caso registra. E casonan ta diferente na añanan anterior. Awor tin mas atraco na casnan individual en bes di negoshinan/empresanan, loke ta ser horta tin menos balor en comparacion cu añanan anterior, ta trata di atraconan di impulso, tin diferente constelacion di atracadornan, mobilidad tambe ta diferente etc.

Pues ta rekeri otro forma di atende cu e situacion. Locual ta ser nota cu ora e atracador ta stranhero nan ta ser yuda dor di Arubiano mes. Segun Wyatt-Ras, no por ta asina cu nos hendenan den nan cas no ta sinti na mes insigur. Esey ta un preocupacion pa Parlamento.

 

En total 17 Parlamentario incluyendo Wyatt-Ras a haci pregunta y dicho preguntanan a ser contesta dor di Minister cu a presenta den Parlamento cu diferente hefe di departamento manera di Cuerpo Policial, KIA, Veiligheidsdienst y conseheronan di minister. Sigur tin un cantidad di punto pa traha riba dj’e. Nos pueblo kier mira cu polis ta presente tur caminda.

 

Ta necesario cu diferente departamento y Ministerio ta traha hunto pa ataka a problematica y cu banda di e trabou sec di polis tin control na frontera, cu tin suficiente Polis, cu por haci uzo di camera, drones y tur otro instrumentonan digital tambe pa por registra y controla individuonan tambe ora nan drenta y sali for di Aruba.

 

Alabes tin cu evalua cierto leynan manera e. o. LTU, wapenvergunning y strafvordering. Pues banda di intervencionannan ta necesario mas informacion pa nos hendenan por ta mas prepara pa cualkier eventualidad. Preveni ta miho cu lamenta. Wyatt-Ras ta kere cu alabes tin cu traha mas dirigi tambe ariba nos hubentud den problema paso nan ta vulnerable pa cay den criminalidad.

E Centro Orthopedagogico mester ser amplia pa atende cu e hobennan mas problematico y tin cu keda sostene buro Reclassering.

 

Wyatt-Ras ta conclui cu aunke cu segun Minister hopi ta ser haci pa domina criminalidad y cu Cuerpo Policial ta haciendo un bon trabou toch tin mas cu tin cu wordo haci pa garantisa trankilidad den nos comunidad.

Top