Presidente di Parlamento: Tanten tin abuso sexual di mucha na Aruba e asunto aki lo keda prioridad di Parlamento

Den entrevista cu Presidente di Parlamento, drs. Mervin Wyatt-Ras, el a trece padilanti cu abuso sexual di menor sigur tin atencion di Parlamento.

Esaki tanten tin abuso di mucha na Aruba. No solamente leynan di inciativa pa cambio di nos Codigo Penal pa loke ta trata delitonan moral a ser aproba dor di Parlamento. Tambe a cambia e Codigo Penal un biaha mas pa modernis’e.

Aki e. o. castigonan a bira mas halto y a introduci boet. A aproba diferente mocion y amienda pa mehora funcionamento di e. o. Buro Sostenemi. A trece cambio den Codigo Civil dunando e buro aki mas autoridad.

Alavez, Parlamento a aproba dos rapport cu recomendacionnan pa Gobierno, esta na aña 2010 y aña pasa na juni 2016. Sin embargo, ciudadanonan no ta contento cu e cantidad di castigo cu ta duna e malhechor en comparacion cu e daño ireparable cu abuso ta causa cerca e victima. Aki ta unda na varios ocasion a discuti den Parlamento.

 

Den e comision Parlamentario encarga cu Husticia, presidi pa Parlamentario mr. Desiree de Souza Croes, a intercambia diaranson cu Minister di Husticia Dowers, hunto cu representante di Ministerio Publico, encuanto e castigonan y kico pa haci pa preveni cu abuso ta tuma luga. Aki a enfastisa cu e castigonan cu ta ser duna ta abou. Ademas, a puntra efecto di castigonan minimo. Parlamentario Croes a haci diferente pregunta na Minister y ta puntra si por haci uzo di “Richtlijnen” di Union Europeo pa nos situacion Arubiano.

 

Wyatt-Ras ta señala cu e consecuencianan di abuso sexual ta devastador pa bida di e menor, su famia, na scol, bario y pa comunidad. E victima ta desaroya e. o. miedo, rabia, berguensa, odio, auto-estima abou cu consecuencianan mas aleu manera problemanan psicologico, psiciatrico, maluzo di droga/alcohol, problema cu relacion y hasta prostitucion y suicidio.

E ta señala cu te ainda nos no tin suficiente ayudo pa e famia y tambe e abusador pa e por rehabilita p’esey mes si duna e abusador castigo abou e chens ta grandi di repiticion. Presidente di Parlamento ta lamenta si cu ora ta trata e tema importante aki, aunke den comision, miembronan di oposicion no ta haci uzo di e oportunidad pa acudi pa nan cuestiona Minister.

 

Wyatt-Ras ta di opinion cu abuso di mucha mester ta los for di politikeria. Si di berdad un Parlamentario kier cuestiona un Minister e mester bin Parlamento den e reunion pa e cuestion’e.

Wyatt-Ras ta contesta un pregunta haci na dj’e y ta trece padilanti tocante di un reunion publico pidi dor di oposicion cu ta trata criminalidad cu ya caba dia 6 di october el a trata un peticion di fraccion di MEP pa papia di criminialidad y na e reunion aki e atendencia tabata abou.

Wyatt-Ras no ta compronde dicon ta pidi reunion y ora yam’e miembronan di e fraccion cu ta pidi reunion no ta show up. Aki no tin seriedad di parti di e fraccion ey. Por lo pronto e asunto di abuso di mucha lo keda ariba agenda di Parlamento.

Wyatt-Ras ta di opinion cu tin cu enfatisa mas e parti di prevencion unda cu ta conta cu mihor preveni cu lamenta. Si castigonan ta halto esaki por tin su efecto tambe riba e abusador cu lo pensa dos biaha prome cu comete fechoria cu un menor.

Top