Presidente di Raad van Advies, F. Goedgedrag den charla na UA – Aruba a logra baha deficit, pero no segun e normanan estableci den protocol

Recientemente mr. Frits M. de los Santos Goedgedrag, Presidente di Raad van Advies, a tene un discurso na Universidad di Aruba. E tema di e charla aki tabata “Ontwikkelingen overheidsfinanciën Aruba”.

E charla aki cu tabata un college publico ta inicio di e Masterclass di Finanza Publico, for di 9 te cu 13 di october, pa miembronan di e cadena financiero na Aruba.

 

E atencion no ta dirigi directamente riba e strategia di maneho di Gobierno, pero e miedo cu e crecemento di e debe na dado momento lo conduci na un nivel di debe incontrolabel y e peso pa e futuro generacion ta bira inhustamente pisa, Goedgedrag a bisa den e colegio cu el a duna.

 

“Nos mester cuminsa pensa riba sostenibilidad di nos finanza publico. E sostenibilidad mester ta e guia enbes di e maneho di strategia financiero scogi.

El a sigui señala cu na mei, 2015, a base di e desaroyonan denter di finanza di Gobierno a keda firma un protocol entre Aruba y Hulanda den cual ta diseña e cuadra pa realisacion di un finanza publico sostenibel por medio di e supervision riba e aspectonan financiero cu kier logra cu presupuesto di pais Aruba.

 

Esaki a resulta finalmente den e Ley di Supervision Financiero temporal (LAtft) den cual un organo nobo di control ta wordo crea y e normanan pa cu deficit di presupuesto ta wordo poni.

E organo nobo aki, el a sigui splica, a bira College Aruba financieel toezicht (CAft), y nan mester a percura cu e normanan di deficit den e diferente sectornan ta wordo cumpli dor di Gobierno.

Aruba, segun e ley nobo, anualmente mester cuminsa baha e deficit or di 3.7% di e Producto Bruto Nacional na 2015 pa un surplus di 0.5% na 2018.

 

Den e presentacion di Frits Goedgedrag a wordo treci dilanti cu den e añanan 2015 y 2016 a cumpli cu e normanan poni. Un analisis adicional sinembargo ta mustra cu e forma con e normanan a wordo logra, no ta cuadra completamente cu e linea di un finanza publico duradero. A resulta cu e cumpli cu e normanan principalmente dor di entradanan incidental extra enbes di medidanan structural y duradero cu lo mester a aumenta e entradanan den forma structural y controla e gastonan.

 

“Esaki ta hiba nos n’e pregunta si nos como pais berdaderamente ta haci lo suficiente pa yega na un finanza publico duradero, y si e contesta ta no, kico ta necesario p’esaki.” Un pregunta cu no a haya contesta.

 

 

Leave a Reply

Top