Presidente di Raad van Advies Frits Goedgedrag: E atencion duna na finanza publico di Aruba no ta nada straño

Recientemente mr. Frits M. de los Santos Goedgedrag, Presidente di Raad van Advies, a tene un discurso na Universidad di Aruba. E tema di e charla aki tabata “Ontwikkelingen overheidsfinanciën Aruba”

E tabata un charla hopi interesante durante cual Goedgedrag a trece dilanti cu e finanza publico di Aruba e ultimo añanan a haya e atencionnan necesario, y no solamente di stakeholdernan local den e trayecto di presupuesto, politico local y otro gremionan local.

Tambe for di Den Haag y organisacionnan internacional di credito cada biaha tabata mustra mas riba, loke nan ta considera preocupante, e desaroyonan den e finanzanan di Ariba.

“Pa papia berdad,” el a bisa, “e atencion aki no ta nada straño.”

 

Na final di 2009 tabatin riba tereno social economico algun reto p’e Gabinete (AVP) cu a caba di sinta, esta Gabinete Mike Eman I. Esaki pasobra Aruba e tempo ey, mescos cu hopi pais a sinti e shocknan financiero – economico di e crisis di credito cu a surgi na 2008.

Y comosifuera cu esaki no tabata suficiente, e refineria Valero, cual tabata e di dos pilar economico di e pais, a anuncia cu nan ta bay stop tur nan actividadnan na Aruba den forma definitivo; centenares di persona a keda sin trabou.

 

E crecemento economico a keda stagna y dor di esey Aruba a hay’e confronta cu un recesion di “dobel dip”.

El a splica cu e tempo ey Aruba a scoge cu pa sigui promove turismo y inversionnan publico den infrastructura. Contrario n’e otro paisnan Caribense – Hulandes y estadonan miembro di Union Europeo – cu den e periodo aki a cuminsa austerisa pa controla e crisis di credito – Gobierno di Aruba a opta ma aumenta nan gastonan, pa stimula e economia.

 

E rasonamento tras di esaki ta cu e maneho pa stimula lo conduci na un economia creciente, pero e maneho aki no a suavisa e situacion, mirando cu e crecemento economico real a stagna.

E reduccion di e actividadnan economico ta un consecuencia di un crecemento menos fuerte di e entradanan for di turismo y un caida den e consumo priva.

Apesar di e inversionnan haci, e entradanan di Gobierno no a subi suficientemente liher.

 

Como consecuencia di e gastonan halto y falta di entradanan, e deficitnan pa Gobierno den cierto añanan tabata basta halto, ora cu e deficit a sigui crece den e seguridad social.

E consecuencia: e debe di Gobierno den corto tempo a subi for di bou di 50% di e Producto Bruto Nacional na 80%.

Un debe di estado basta halto, segun Frits Goedgedrag, si haci un comparacion cu e margennan aceptabel di e grandi di un debe di estado pa un economia chikito manera di Aruba.

 

E ariba menciona, ta motibo p’e atencion creciente y critica riba e desaroyonan denter di e finanzanan publico di Aruba.

 

 

Leave a Reply

Top