Presidente nobo di CAft Raymond Gradus: ”Alcansa e normanan di presupuesto di 2017 y 2018 ta di gran importancia pa mantene finansa publico sostenibel”

Colegio di supervision financiero di Aruba ta considera cu alcansa e normanan presupuestario pa 2017 y e añanan posterior ta di gran importancia pa reduci e debe publico di Aruba y haci finansa publico sostenibel. Esey Raymond Gradus a afirma durante su prome bishita na Aruba como Presidente di CAft.

Pa 2017 ta necesario pa vigila strictamente cumplimento di e medidanan proponi pa reduci e deficit di financiacion.
Pa motibo di e resultadonan di e prome semester CAft ta preocupa p’e ingresonan decepcionante y e gastonan creciente.
Banda di esey durante su bishita CAft a insisti pa entrega mas pronto posibel na Parlamento e presupuesto di 2018, den cual a tene cuenta cu e norma den LAft di un surplus di 0,5% di e PIB.

PRESUPUESTO DI 2017 BOU DI PRESION
Den e prome semester Pais Aruba a realisa un deficit di 1,6% di e PIB. E surplus di e sector colectivo, excluyendo pais, segun e pronostico di Aruba lo alcansa 0,1% di e PIB pa henter 2017.
Esaki ta nifica cu e deficit di Pais Aruba mester baha di 1,6% di e PIB pa 0,6% di e PIB den e di dos semester di 2017. Kiermen cu Pais Aruba ta enfrenta e reto pa realisa un surplus di 1,0% di e PIB (alrededor di AWG 50 miyon).

Aunke realisacion di impuesto riba salario y di impuesto riba volumen di benta (BBO) na mitar di aña ta mas halto cu e ingresonan den e prome semester di 2016, tog nan ta atrasa respecto e presupuesto.
Pa algun partida di gasto tambe por constata un patronchi di gasto mas rapido cu den e ultimo añanan.
E ingresonan fiscal atrasa ta debi parcialmente n’e retraso den e trabounan rond di reapertura di e refineria.

E ingresonan fiscal atrasa di e aña aki ta ocasiona ademas un riesgo p’e presupuesto di 2018, ya cu Aruba, conforme LAft, mester alcansa un surplus di financiacion di 0,5% di e PIB na 2018.
Sin ingreso fiscal cu ta atrae capital fuertemente lo bira precario -no solamente na 2017, sino particularmente tambe na 2018- pa cumpli cu e norma, Raymond Gradus, Presidente di Caft a duna di conoce.
CAft ainda no a ricibi un proyecto di presupuesto di 2018 di Gobierno. Durante su bishita CAft a insisti pa entrega e presupuesto di 2018 mas pronto posibel na Parlamento, pa por aproba e presupuesto na tempo. Esaki ta di importancia en relacion cu e programa de prestamo.

BISHITA DI CAFT CU PRESIDENTE NOBO
E bishita di dos dia di CAft na Aruba tabata e prome bou di liderazgo di e Presidente nobo Raymond Gradus.
CAft ta consisti awor di Raymond Gradus, Robert Croes y Sybilla Dekker. E Presidente nobo ta mira atras na un bishita fructifero na Aruba.
CAft a tene combersacion regular cu Gobernador, Ministro di Finansa demisionario, Conseho di Ministro demisionario y e Comision di Finansa, Asunto Economico y Organisacion Gubernamental di Parlamento.
Banda di esey CAft a haci bishita na, e.o., Banco Central di Aruba, Conseho Consultativo y Aruba Ports Authority.

Top