Presupuesto realistico 2017 confirma pa CAFT y esun 2016 ‘on the dot’ confirma cu di 4 reportahe kwartaal Segun Parlamentario Chris Dammers

Parlamento a ricibi dia 15 februari 2017 e di reportahe financiero di e di 4 kwartaal for di Minister di Finansa, mr. Angel Bermudez, relaciona cu e presupuesto pa aňa 2016.

Esaki despues cu por a mira den un documento prepara pa College Aruba Financieel Toezicht (CAFT), di dia 8 februari 2017, caminda cu nan ta pone nan stempel di aprobacion riba e presupuesto di pais Aruba 2017.

 

Ni cuanto oposicion por a grita cada biaha durante di tratamento nan di presupuestonan of den prensa den pasado den e periodonan di Gabinete Mike Eman I y II cu e presupuestonan no lo tabata realistico por ser bisa cu cada un di nan – pa locual t’e normanan y e deficit – a cumpli un pa un cu e normanan stipula y e sumanan presupuesta, kedando cada aña den locual a presupuesta, segun analisis di Chris Dammers.

 

E reportahe aki, prepara pa Departamento Financiero di Gobierno, pa sera aňa 2016 ta conclui bisando bon cla cu pais Aruba un bes mas ta cumpli cabalmente cu e norma di deficit – e biaha aki esta 2% stipula pa aňa 2016.

Asina mes cu na caminda Banco Central di Aruba a ahusta e GDP di pais Aruba pa aňa 2016 durante e di 3 kwartaal, bahando esaki di 4.922 biyon pa 4.754 biyon.

 

E reportahe tambe ta acentua e hecho cu pa di prome bes den historia di pais Aruba a cumpli cabalmente den 2016 di aproba e cuenta anual di aňa 2015, di presenta e presupuesto di aňa 2016 y aproba esaki, y di entrega e presupuesto supletorio di aňa 2106 y aproba esaki.

Banda di esakinan a entrega na ora e 4 reportahenan di cada kwartaal mustrando un maneho financiero transparente.

Cu tur e aprobacionnan aki pais Aruba a cumpli cu tur e norma nan di e ley di comptabilidad y di e Landsverordening Tijdelijk Aruba Financieel Toezicht, cual ultimo ta un ley cu partido MEP a yora p’esaki wordo aplica aki na Aruba.

 

Pero awe nos ta mira bek cu cabalmente Gabinetenan di Mike Eman I y II desde 2009 ora cu a asumi responsabilidad gubernamental a entrega presupuestonan realistico y a cumpli tambe cu esakinan.

Pa 2016 a logra gasta 19 miyon menos cu loke tabata presupuesta di e 1.363 miyon, cual tabata gastonan menos den personal y goederen en diensten, entre otro.

Na entradanan pais Aruba a logra haya 1.233 miyon na entradanan cu ta 31.3 miyon mas compara cu aňa 2015.

Sigur nos mester gradici e team di profesionalnan rond di Minister di Finansa, na Departamento di Finansa, Belasting y Aduana.

Nos a haci tur esaki cu nos profesionalnan Aruba di cual nos tur por ta orguyoso.

 

 

 

Prome cu a introduci e ley di CAFT Hulanda a priminti di lo a asisti cu profesionalnan di Finansa y Belasting cu nunca no a yega.

Na un manera structura y planifica nos a logra tur esaki cu nos Arubanonan.

Un finansa publico sostenibel lo tabata solamente posibel pa logra – manera stipula den e raport  di Banco Central di 13 juli 2013 si cualkier Gobierno cumpli cu e siguiente puntonan: Calidad di recuperacion den e sector turistico; posicion financiero debil di Gobierno; dilemanan rond di e fondo di pensioen pa ambtenaar y fondo di pensioen general di biehes; e gastonan di personal relativamente halto; AZV, caminda cu Gobierno mester hinca sumanan grandi anualmente aden di ariba di 100 miyon; Logra habri y tene e refineria cu lo mester opera na un manera stabiel.

 

Tur esaki Gabinette nan Mike I y II a cumpli cu nan, wantando e cantidad di sla di mas grandi den e situacion financiero di pais Aruba.

Gabinete Mike Eman I y II a logra di maneha tur e retonan menciona, creando tur espacio pa tene e poder di compra riba un nivel aceptabel pa nos hende, minimalisando tur e problemanan social cu nos a bin haya na final di 2009, invertiendo den economia di pais Aruba cu diferente proyectonan, minimalisando e problemanan social bahando nos desempleo di riba di 10% na final di aña 2009 pa alrededor di 7% te cu na final di aňa 2016.

 

Asina tambe den su totalidad Gobiernonan Mike Eman I y II, manera CBA a relata na 2010, a cumpli cu tur e deficiencianan di pais Aruba cu tabata haci gobernacion aki na Aruba dificil caminda cu nos por papia di un Aruba cu un situacion financiero stabiel, segun Chris Dammers di AVP.

Top