Princess Cruise Lines ta haya multa record pa tiramento ilegal di sushi contamina

FLORIDA – Un liña crucero importante mester paga un multa di 40 miyon dollar – e mas grandi di tur e delitonan cu ta envolve contaminacion di e barco crucero.

E sentencia a wordo duna na Princess Cruise Lines pa tiramento di sushi contamina cu azeta.

 

Hues a ordena cu 1 miyon dollar wordo duna na un ingeniero Britanico, kende t’esun cu a reporta e caso aki na e Maritimo Britanico y e Agencia di Guardacosta, cu na su turno a entrega e evidencianan na Guadracosta di Estados Unidos.

E ingeniero di Caribbean Princess a reporta cu e asina-yama “magic pipe” a wordo uza dia 23 di augustus, 2013, pa tira sushi contamina cu azeta den e costa di Inglatera sin e uzo di ekipo special.

 

E evidencia cu a wordo recolecta pa e ingeniero, incluyendo potretnan di e “magic pipe”, a conduci na un inspeccion rib’e barco crucero ambos na Inglatera y despues na New York dia 14 di september, 2013. Durante cada un di e inspeccionnan, cierto miembronan di e tripulacion a sconde e actividadnan ilegal aki dor di gaña autoridad, di acuerdo cu ordennan cu nan a ricibi for di e oficialnan ingeniero di Caribbean Princess.

 

E sentencia tambe ta rekeri cu Princess permanece den un periodo di prueba pa cinco aña.

Durante e periodo aki, tur e companianan crucero di Carnival cu ta opera den Estados Unidos mester implementa un plan di cumplimento ambiental cu ta inclui audits independiente haci dor di un compania externo y supervision di monitor.

Princess ya a tuma varios medida corectivo despues di investigacion gubernamental.

 

Di acuerdo cu documentonan presenta den Corte, Caribbean Princess ta tirando sushi di forma ilegal a traves di ekipo di bypass desde 2005, net 1 aña despues cu e barco crucero a cuminsa opera.

E caso contra Princess ta inclui practicanan ilegal cu a tuma luga tambe riba cinco barconan di Princess – Caribbean Princess, Star Princess, Grand Princess, Coral Princess y Golden Princess.

 

Ademas, e documentonan ta mustra cu ingenieronan senior di e barco crucero a ordena pa desmantela e sistema di bypass y instrui e miembronan di tripulacion pa gaña.

E liña crucero tambe a admiti cu e hefe ingeniero a tene un reunion falso den e sala di control pa pretende cu ta atendiendo cu e situacion, mientras wantando un carta skirbi: “LA is listening”.

E ingenieronan presente a compronde cu cualkier cos cu ser bisa por wordo scucha pa esnan na e sede di compania na Los Angeles, pues e sala di control tabatin un sistema pa monitor combersacionnan.

 

Un motibo percibi p’e crimennan aki ta financiero – e hefe ingeniero cu a ordena pa tira e sushinan contamina na e costa di Inglatera a bisa cu ta costa hopi pa deshaci di esakinan apropiadamente na e port y cu e superintendente lo no kier paga e gastonan.

Top