Prioridad di partido POR na e momentonan aki ta pa trece solucion pa retonan indica como prioridad den comunidad

Den medionan di comunicacion tin diferente informacion cu ta keda treci dilanti pa loke ta reparticion di carteranan p’e proximo Gobierno.

Lider di POR sr. Otmar Oduber a indica cu te ainda no a toca temanan pa loke ta trata carteranan na e momentonan aki.

Tin prioridadnan si, y esakinan a keda entrega den e documento cu a bay pa informador den cual a mustra cu POR su prioridadnan ta loke a identifica for di comunidad di Aruba, y den esaki tin e aspecto di inseguridad cu ta biba na Aruba, aspecto economico cu ta encera creacion di un revolucion economico y posibilidadnan nobo pa esnan cu ta inverti na Aruba.

Pero tambe pa percura cu nos mesun hendenan tin miho entrada a base di e costo di bida halto cu tin, y trece solucion pa retonan di salubridad cu ta keda aspectonan importante, ta loke cu sr. Oduber a splica.

 

“Den e discusionnan ey, unabes cu sinta na mesa y dicidi cua t’e base cu ta bay forma e proximo coalicion, te n’e momento ey e discusionnan lo inicia a base di un programa pa goberna.

Den e proceso aki lo pone e diferente programanan hunto pa traha un solo programa hunto (general) pa bay keda ehecuta den e proximo 4 añanan.

A base di esey, e ora ey mester bay dicidi con e reparticion di carteranan lo bay ta.”

 

Si wak con reparticion a bay den historia, semper e reparticion ora cu tabatin partidonan di 9 asiento cu 2 asiento manera tabatin 9-1-1, tur a reparti a base di 5-2. Den e caso aki lo mester mira e ora si ta yama un partido adicional den e caso aki pa inclui partido RED pa amplia e base y hacie uno mas amplio manera cu sr. Gobernador a pidi, e ora ey lo tin un scenario nobo cu mester bay papia riba dje.

 

Finalmente sr. Oduber a enfatisa cu no a yega n’e punto di discusion ainda pa loke t’e reparticion aki, y den e caso aki e ta keda n’e partidonan cu ta bay forma Gobierno pa bay wak con e prioridadnan den e programa ta y si mester amplia y yega na un coalicion di 3.

Lo mester mira ken ta esnan cu ta asumi e responsabilidad conforme di e programa y eynan lo reparti e carteranan conforme e prioridadnan di Aruba.

 

Leave a Reply

Top