Procesonan cuminsa cu Aruba Health Care Conference 2015 ta conoce continuidad

Minister di Salud Publico di Sint Maarten di bishita cerca su homologo di Aruba

Procesonan cuminsa cu Aruba Health Care Conference 2015 ta conoce continuidad

Schwengle (1)Pa motibonan politico y fuera di alcance di esunnan envolvi na Sint Maarten y Corsou a presenta un retraso den diferente plan cu mester a cuminsa tuma forma caba for di e di prome Aruba Health Care Conference, cual a tuma luga na aña 2015.

E conferencia a keda organisa pa Ministerio di Salud como un momento di reflexion, y evaluacion di oportunidadnan pa traha hunto y opcionnan riba tereno di salud publico cu ta beneficioso pa tur pais den Reino.

E enfoke di Aruba Health Care Conference ta principalmente riba colaboracion y e proceso di siña for di e “best practices” di cada pais.

Recientemente, Minister di Salud Publico, Deporte y Maneho di Nos Grandinan, dr. Alex Schwengle tabata na Sint Maarten di bishita cerca cu homologo, Minister Emil Lee.

Nan a combersa riba diferente tema di interes general.

E follow up rib’e topiconan pendiente di Aruba Health Care Conference a cuminsa, y e. o. Minister Lee a mustra un interes grandi den particularmente con e seguro di salud general, esta AZV ta funciona.

Consecuentemente, e mandatario a bishita Aruba siman pasa pa combersa cu AZV, y Minister Schwengle, como tambe demas stakeholders pa cu AZV.

Pa loke ta trata specificamente Aruba Health Care Conference, Minister Schwengle ta spera di wak mehoracion den e procesonan y reestablece algun di e iniciativanan otro aña na e di dos conferencia.

Tabatin cierto combersacionnan cu mester resulta den beneficionan mutuo, y ainda ta papiando tocante e topiconan aki, manera e compra di cuido den exterior hunto p’asina haya un miho prijs y baha gastonan pa e sistema di cuido.

Un cooperacion entre e tres islanan tambe lo resulta den un miho posicion pa papia y negocia, Minister Schwengle a agrega.

El a splica cu anteriormente Aruba tabata cumpra servicionan di cuido pa medio di un broker na Colombia, pero awo – cu e condicion principal cu e institucion tin su acreditacion di JCI, cual ta garantisa un nivel internacional minimo di calidad, AZV ta cumprando servicionan directamente cerca e proveedor.

Aruba tambe ta cumpra servicionan di cuido na Hulanda, y aunke e ta menos compara cu Colombia, asina mes e ta un suma substancia, segun e Minister.

Si acaso e tres islanan, esta Aruba, Corsou y Sint Maarten, traha hunto como un mercado mas grandi, lo tin beneficionan sigur den e proceso pa cumpra servicio y den e calidad di servicionan cu e aseguradonan lo ricibi, Minister Schwengle a remarca.

Top