Prof dr. Raymond Gradus, Presidente nobo di Colegio di supervision financiero

Conseho di Ministro di Reino a nombra señor prof. dr. R.H.J.M. Gradus Presidente nobo di e Colegionan di supervision financiero entrante dia 1 di juli 2017.

Di e forma aki señor Gradus ta sigui prof. dr. A.F.P Bakker, kende for di dia 1 di december 2011 tabata Presidente di e Colegionan (CFT).

 

Cu consentimento di e paisnan y di e entidadnan publico di Reino Hulandes, Conseho di Ministro di Reino a nombra prof. dr. Raymond Gradus Presidente nobo di e tres Colegionan di supervision financiero entrante dia 1 di juli 2017.

Señor Gradus (1962) a studia Econometria General y Empresarial na Universidad di Tilburg, na unda el a doctora na 1990 y tabata emplea durante cierto tempo como docente universitario di  Economia General.

 

For di 1992 el a traha sucesivamente na Ministerio di Finansa, Ministerio di Asunto Economico, y Ministerio di Asunto Social y Labor.

N’e delaster Ministerio e tabata Director di Asunto Financiero Economico durante 5 aña. Di 2008 te 2015 e tabata Director di Instituto Cientifico pa CDA.

For di 2004 e ta catedratico di Administracion y Economia di Sector Publico y Sin Fin Lucrativo na Vrije Universiteit di Amsterdam.

 

Raymond Gradus ta sigui Age Bakker, kende kier dedica su mes mas na su otro actividadnan profesional, entre nan su funcion di miembro den servicio extraordinario di Conseho di Estado (Raad van State) na Den Haag.

E cambio di Presidente dia 1 di juli ta un fecha logico. Na mitar di aña e ciclo nobo p’e presupuestonan di 2018 di e paisnan y di e entidadnan publico ta cuminsa y e ciclo anterior di presupuesto cu su hustificacion den e cuentanan anual di 2016 ta termina.

 

Age Bakker tabata pa mas di 5 aña y mey Presidente di Cft Corsou y Sint Maarten, Cft Bonaire, Sint Eustatius y Saba y for di 2015 tambe di Colegio di supervision financiero di Aruba (Caft).

E ta mira atras na un periodo fructifero, den cual e paisnan y e entidadnan publico a progresa masha hopi den saneamento di finansa publico y mehoracion di administracion financiero.

 

Age Bakker: “Mi ta masha gradicido p’e bon colaboracion cu e Gobiernonan y e Colegionan Ehecutivo di e parti Caribense di Reino Hulandes y e confiansa cu mi a haya di nan.

Na 2016 pa prome biaha desde 10-10-’10 tur pais y entidad publico a cumpli cu e normanan di presupuesto.

Esey ta crea un base estupendo pa bay traha awor na fortalecemento di e crecemento economico, cual ta urgentemente necesario pa crea suficiente empleo y pa mehora poder di compra.

Un impulso nobo na colaboracion denter di Reino Hulandes, basa riba respet y confiansa mutuo, por contribui enormemente na esey.

Mi ta desea mi sucesor Raymond Gradus, mi coleganan di e Colegionan y e empleadonan na e secretariadonan na Willemstad, Oranjestad y Philipsburg masha hopi exito cu esey.”

 

 

 

Top