Profesor Ralph Belton di e Universidad di e Districtro di Columbia A bishita Aruba pa sondea e posibilidad di “Agricultura Urbano” den centro di Oranjestad

Algun ana pasa, Minister Mike Eman, a firma un MOU cu e Universidad di e Districtro di Columbia na Washington DC pa e motibo cu e Universidad tin un facultad hopi renombra na Merca pa e diferente modelonan den systemanan di Agricultura sustenibel pero den centro di ciudad y areanan urbano. E idea aki ta cuadra cu e vision y deseo di e Gobierno di Aruba, cual ta produci den tur areanan posibel pa crea un seguridad di cuminda como tambe oportunidad di trabou den e ramo aki.

Na october 2015, un delegacion chikito di Santa Rosa, encabesa pa e directora, sra. Nathalie Maduro, a biaha pa Washington DC y a haci un bishita extensivo den cual a cera conoci cu e diferente areanan di estudio den e ramo aki y tambe a bishita e diferente proyectonan urbano den cual e maneho di Agricultura urbano ya ta wordo implementa exitosamente.

Recientemente, Profesor Ralph Belton, encarga cu e Facultad di Arquitectura y kende porcierto ta naci tambe na Aruba, a bishita Aruba, pa bin haci un sondeo di kico ta e diferente oportunidad nan cu Aruba ta ofrece pa establece proyectonan di Agricultura urbano den centro di Oranjestad y otro areanan na Aruba caminda cu normalmente no tin custumber pa produci pero cu tin un concentracion halto di habitante of usarionan di e localidadnan, cu semper lo por beneficia di e produccionan aki.

Awendia di sistemanan manera Hydroponics, Aquaponics, Aeroponic, Vertical farming, Rooftop farming etc. cual ta sistemanan moderno den cual por produci un cantidad halto di producto pero sin interferi cu e desaroyo di e espacio. Por inclui tambe sistemanan di energia renovable mediante solar panels of windchargers, cerando e circulo completo pa locual ta sostenibilidad di henter e proyecto.

Di acuerdo cu Sra. Maduro, Directora di Santa Rosa, “Nos mester cuminsa studia e posibilidad di e introduccion di sistemanan modernisa cu por yuda nos Aruba yega na un seguridad di cuminda a largo plazo, a pesar di tur e retonan cu tereno y awa cu nos por tin. Esakinan ta sistemanan nobo y cu lo rekeri cambio den nos manera di planifica, sin embargo, si tur hende reconoce e balor agrega na e introduccion di e tipo di modelonan aki den nan proyectonan, no solamente lo nos conta cu edificionan cubri cu areanan berde cu lo yuda mantene e calor den e edificio mas abou, pero tambe lo por ofrece un cantidad di productonan fresco pa consumo y otro oportunidad di negoshi pa esnan interesa di haci uzo di e espacionan aki pa produci.”

Durante su bishita na Aruba, Profesor Belton a duna un presentacion na Minister Presidente, sr. mr. Mike Eman conhuntamente cu Minister Ing. Benny Sevinger.
Tambe a reuni cu e ehectivonan di Santa Rosa y Infra Team pa “brainstorm” encuanto di e posibel solucion y remodelacion di un edificio den centro di Oranjestad cu lo por bay bira e “edificio modelo” como introduccion di e concepto aki na Aruba.
Prof. Belton a haci un bishita tambe na Santa Rosa, caminda el a duna un presentacion encuanto di e henter e sistema y con esaki lo por beneficia Agricultura den futuro na Aruba.

Pa asegura cu e ta comparti su conocemento cu nos studiantenan, Prof. Belton a duna un charla na e studiantenan di EPI (Sector Technico) caminda cu el a splica encuanto di e concepto di Agricultura Urbano mediante e uso di espacio y edificionan urbano.

Tambe el a splica encuanto di e Universidad mes y kico esaki lo por ofrece na esanan cu ta desea di bay sigui nan estudio den e ramo aki. Esaki sigur ta un di e metanan principal di Santa Rosa, pa yuda conscientisa y motiva nos studiantenan pa escoge un estudio avansa den e tecnologianan moderno den Agricultura.

Otro bishitanan cu Prof. Belton a haci durante su estadia, tabata cerca di sr. Glenn Thode encarga cu Universidad di Aruba, caminda cu a combersa riba e diferente oportunidad nan con e dos Universidadnan por traha hunto den futuro, den cuadro di e planes nan cu tin pa establece un “Green Faculty” na Universidad di Aruba. Tambe el a reuni cu sra. Astrid Britten y sr. Ronny Alders na Biblioteca Nacional pa haña mas informacion encuanto di e “Green Educational Symposium.
Por ultimo Prof. Belton a reuni cu sr. Frank Hoevertsz y su team na Utilities NV caminda cu a combersa referente e diferente sistemanan moderno den Agricultura y uso di awa recicla.
A toca e tema tambe uzo di “waiste” cu por yuda pa crea energia y compost cual awendia ta djis wordo kima na dump.

E siguiente paso awor lo ta, pa Profesor Belton traha un raport di e diferente oportunidad cu por a señala y conhuntamente cu su team di coleganan experto y studiantenan di e Universidad, lo haci un estudio y crea un plan lo wordo entrega na Gobierno di Aruba, creando asina e di prome edifico completamente sustenibel cu por produci uzando energia natural y cu por yuda pa motiva studiantenan y especialmente nos entrepeneurs local pa considera e tipo di proyectonan aki como un posibel negoshi.

Adhunto por aprecia algun potret di e bishita di Profesor Belton na Aruba. Danki na tur cu a coopera cu Santa Rosa Aruba cu nan participacion y cooperacion durante e bishita di Prof. Belton.

Top