Programa Luz den Bario ta sigui – Un programa cu a para bira un exito sin precedencia

Prome Minister Mike Eman ta informa cu e popular programa Luz den Bario ta sigui. Aunke cu tabatin algun siman di pauze, por bisa cu e progama ta sigui e siman aki ainda.

Programa Luz den Bario ta un iniciativa di Prome Minister Mike Eman despues cu el a bishita barionan durante su prome Gobierno.

Prome cu esey tambe y a scucha cu un di e principal preocupacionnan di e habitantenan t’e falta di luz den hopi bario rond Aruba.

 

Prome Minister Eman a crea un programa cu yama Luz den Bario, den cual el a haya cooperacion di su coleganan Ministernan Benny Sevinger y Mike de Meza.

Bou di e programa ey hopi bario a wordo ilumina for di 2012 bin’riba. A bay mas leu. NV ELMAR a dicidi hunto cu su principal accionista cu ta Gobierno pa dal un stap mas aleu. Mirando e maneho di Gabinete Mike Eman II pa crea un Aruba mas berde, sostenibel den diferente sector, a dicidi di yega na un acuerdo cu Philips pa cambia tur e luznan convencional di caya pa luznan LED.

 

Prome Minister Eman a splica cu e luznan LED no solamente ta cuadra cu e maneho berde di su Gabinete, e ta hopi eficiente pa loke ta consumo di energia cu ta nifica cu e lo baha e gastonan di Gobierno.

“Nos a pensa di mantene e presupuesto reserva pa pago di gastonan di iluminacion na ELMAR. Loke nos ta spaar ta bay pa crea mas puntonan di iluminacion den barionan cu nunca a conoce luz di caya y di e forma aki nos ta mehora e calidad di bida di nos ciudadanonan cu ta sinti nan mes mas sigur.”

 

ELMAR mientrastanto ta practicamente cla pa cambia e 9 mil luznan di caya convencional pa luz LED. Nan a cumpra adicionalmente mas cu 3 mil luz LED cu ta bay wordo uza den barionan cu no tin luz, principalmente barionan cu hopi cas.

E lo yuda e habitantenan tambe baha nan consumo di coriente, dor cu nan no mester laga luz di cas sendi anochi mas.

E experiencia te awor ta cu e luznan aki ta hopi briyante y ta brinda claridad na un area mas grandi cu e luznan convencional.

 

Hopi bario nobo a wordo crea den ultimo añanan y e infrastructura ta algo cu a lubida riba dje. Pesey desde prome Gabinete Mike Eman a concentra pa drecha e situacion aki. Hopi bario a haya iluminacion y falta mas.

“Nos no a lubida riba esnan cu falta ainda. E iluminacion ta bay yega den tur bario. Nos ta traha cu un schedule cu ayudo di ELMAR y di e forma aki nos a logra cu rond Aruba a bin ta poniendo puntonan di iluminacion nobo.

 

E programa ta sigui, pasobra mi no lo descansa te ora cu tur bario di Aruba tin un bon iluminacion di caya,” Mike Eman ta bisa.

E siman aki lo instala luz di caya nobo den e bario nobo di Topaz na Noord. Habitantenan di otro barionan keda pendiente, pasobra serca boso tambe e luznan LED di caya lo yega.

 

Leave a Reply

Top